Kurti: Mbi 53 për qind e rasteve të kancerit të gjirit u kapën në stadet e hershme gjatë 2025

Kryeministri i Kosovës, Albin Kurti, ka bërë të ditur se gjatë vitit 2025, mbi 53.4 për qind e të prekurve nga kanceri i gjirit në vend janë diagnostikuar në faza fillestare, duke vënë inftasolin kryesor te domosdoshmëria e kontrolleve mjekësore dhe zbulimit të hershëm të sëmundjes. Gjatë kësaj periudhe, statistikat tregojnë se janë shënuar 601 raste të reja, ku 592 prej tyre i takojnë gjinisë femërore dhe nëntë të tjerë asaj mashkullore, shifra këto të bëra publike në ceremoninë e hapjes së fushatës sensibilizuese “Tetori Rozë”. Në fjalën e tij, kreu i ekzekutivit përmendi ndryshimin rrënjësor krahasuar me periudhën para vitit 2022, kur shumica e rasteve zbuloheshin vetëm në fazën e tretë ose të katërt. Sipas tij, ky përmirësim është rezultat i shtimit të pajisjeve mjekësore dhe fushatave vetëdijesuese të ndërmarra nga Ministria e Shëndetësisë në bashkëpunim me sektorin joqeveritar. “Jemi këtu për gratë që janë në trajtim, dhe për ato të cilat e kanë përfunduar atë, që të rrisin vetëdijen për rëndësinë e kontrolleve të rregullta, pra të zbulimit të hershëm dhe të trajtimit me kohë. Falënderoj të gjitha organizatat që përmes punës së tyre të përditshme u qëndrojnë pranë grave dhe familjeve tyre. Gjatë vitit 2025, në Kosovë janë raportuar 601 raste të reja të kancerit të gjirit; 592 te gratë dhe 9 te burrat. Deri në vitin 2022, shumica e rasteve të diagnostikuara me kancer të gjirit ishin ose në fazën e tretë, ose të katërt. Falë shtimit të pajisjeve diagnostikuese dhe fushatave ndërgjegjësuese, nga Ministria e Shëndetësisë dhe në bashkëpunim me organizatat joqeveritare, në vitet 2023 dhe 2024 shumica e rasteve u diagnostikuan në fazën e parë ose të dytë. I njëjti trend është evidentuar edhe në vitin e kaluar, 2025, kur mbi 53.4% të rasteve janë diagnostikuar në stadet e hershme. Për këto raste, mundësitë për trajtim dhe shërim janë dukshëm më të mira. Zbulimi i hershëm është aq i rëndësishëm saqë jetik. Shqetësimet nuk duhet injoruar, dhe kontrollet nuk duhet shtyrë e vonuar”, u shpreh Kurti. Ndër të tjera, kryeministri theksoi se shërbimet e mamografisë ofrohen pa pagesë në sistemin publik shëndetësor qysh prej vitit 2023, ndërsa bëri të ditur se një pajisje e re tashmë është vënë në funksion në komunën e Fushë-Kosovës. Po ashtu, ai njoftoi për investimet e kryera në Klinikën e Onkologjisë, ku janë instaluar dy akseleratorë modernë, përfshirë njërin të pajisur me sistemin e avancuar CRAD, që mundëson radioterapi me precizion të lartë. “Në shëndetësinë publike, që nga viti 2023, mamografia ofrohet falas. Së fundmi, një mamograf është blerë dhe tashmë është funksional në Fushë-Kosovë. E në shëndetësinë tek ne, konkretisht në Klinikën e Onkologjisë, janë vendosur edhe dy akseleratorë të rinj, njëri prej tyre është i pajisur me sistemin CRAD, që ndihmon në realizimin e radioterapisë me saktësi të lartë, i vetmi në rajon. Por përveç Fushë-Kosovës, janë edhe 8 mamografë të tjerë që të gjithë dixhitalë, të cilët do të vijnë këtë vit dhe do të shpërndahen nëpër komunat e Kosovës, aty ku nuk ka”, përfundoi ai.