Mbrojtja e vlerave të UÇK-së: Senati i Universitetit të Prishtinës miraton deklaratën historike

Gjatë mbledhjes së zhvilluar një ditë më parë, Senati i Universitetit të Prishtinës ka miratuar zyrtarisht një deklaratë që i kushtohet luftës së drejtë të popullit të Kosovës për liri, demokraci dhe pavarësi. Ky institucion ka theksuar bindjen e tij se vendimet e drejtësisë duhet të jenë të pavarura, plotësisht të paanshme, objektive dhe të mbështetura fort në prova, standarde ligjore dhe parimet bazë të një procesi të rregullt gjyqësor. Në dokument theksohet se “universiteti beson se drejtësia e qëndrueshme nuk mund të ndërtohet mbi paragjykime kolektive”. Njëkohësisht, ky institucion akademik vlerëson se rrugëtimi historik i luftës së Kosovës nuk mund të shkëputet nga realiteti politik, shoqëror dhe humanitar në të cilin u zhvillua. Lufta e Ushtrisë Çlirimtare të Kosovës ishte pjesë e përpjekjeve sublime të popullit për të mbrojtur vatrat, jetën, dinjitetin njerëzor, liritë individuale e kolektive, si dhe të drejtën elementare për të jetuar të lirë nga dhuna dhe represioni. Ky konflikt u zhvillua nën kushtet e dhunës sistematike, dëbimeve masive të popullsisë shqiptare të Kosovës dhe shkeljeve të rënda të të drejtave të njeriut e të drejtës humanitare. Këto ngjarje përfaqësojnë një histori të dokumentuar qartë, pa të cilën nuk mund të kuptohet drejt lufta për liri. Për pasojë, çdo qasje serioze ndaj kësaj periudhe duhet domosdoshmërisht të mbështetet në këtë kontekst historik dhe humanitar. Ndërhyrja dhe mbështetja e NATO-s duhet të lexohen pikërisht përmes krizës humanitare, dhunës së shpërndarë, shpërnguljeve të popullsisë dhe domosdoshmërisë për mbrojtjen e tyre. Po ashtu, në këtë deklaratë i është bërë thirrje opinionit këshillimor të Gjykatës Ndërkombëtare të Drejtësisë të datës 22 korrik 2010, ku u konkludua se shpallja e pavarësisë së Kosovës më 17 shkurt 2008 nuk shkeli të drejtën ndërkombëtare. Universiteti i Prishtinës shpreh besimin se e vërteta historike duhet kërkuar përmes dokumenteve zyrtare, dëshmive të gjalla, hulumtimeve shkencore dhe debatit të hapur akademik. Sipas këtij institucioni, e vërteta për luftën e Kosovës nuk guxon të ndërtohet mbi mohimin, relativizimin apo instrumentalizimin politik të historisë, por kërkon një shqyrtim kritik dhe të përgjegjshëm të fakteve. Si institucioni më i madh publik i arsimit të lartë dhe kërkimit shkencor në vend, Universiteti i Prishtinës mbetet i hapur dhe i përkushtuar që, me të gjitha kapacitetet e veta akademike e institucionale, të kontribuojë në dokumentimin, studimin dhe ndriçimin e së vërtetës historike për luftën çlirimtare, për dhunën e ushtruar ndaj civilëve, për përvojën e rëndë të viktimave e të zhvendosurve, si dhe për rrugëtimin që solli lirinë dhe shtetësinë e Kosovës. Kjo përfaqëson një detyrim moral ndaj të vërtetës, viktimave, brezave që kaluan luftën, por edhe ndaj të rinjve që meritojnë ta njohin historinë e vendit të tyre bazuar në fakte, dokumente dhe standarde akademike. Në fund të deklaratës bëhet e ditur se Universiteti i Prishtinës do të vazhdojë të mbrojë me vendosmëri lirinë akademike, kërkimin shkencor dhe të drejtën për të studiuar historinë kombëtare pa frikë, pa presione dhe pa ndërhyrje politike. Institucioni mbetet i gatshëm të vërë në shërbim ekspertizën e tij për çdo nismë serioze që synon dokumentimin e së vërtetës për luftën e Kosovës, rrugën drejt lirisë dhe themelet e shtetndërtimit.