Reagimi ndaj Dhomave të Specializuara, Tahiri: Të hënën Kuvendi miraton deklaratën e përbashkët

Pas përfundimit të mbledhjes së Kryesisë së Kuvendit, deputeti i Partisë Demokratike të Kosovës, Arian Tahiri, ka bërë të ditur se nisma ligjore për Dhomat e Specializuara tashmë i ka kaluar ekzekutivit. Gjatë kësaj paraqitjeje, ai ka bërë me dije se kryetarja e Kuvendit, Albulena Haxhiu, ka marrë përsipër të bisedojë drejtpërdrejt me kryeministrin Albin Kurti me qëllim të përshpejtimit të procedurave përkatëse. Duke vlerësuar se qytetarët kanë legjitimitet të plotë në kërkesat e tyre drejtuar instancave shtetërore, Tahiri ka bërë thirrje për një unitet më të gjerë institucional. Sipas tij, Kuvendi dhe Qeveria duhet të bashkojnë forcat për t'i dhënë një përgjigje të unifikuar asaj që ai e ka quajtur padrejtësi ndaj qytetarëve dhe shtetit të Kosovës. "Qytetarët me plot të drejtë kanë kërkesë të drejtuar nga Kuvendi dhe nga Qeveria. Veproni, koordinonu, organizonu, unifikohuni, dhe ky lloj padrejtësie historike ndaj kombit shqiptar dhe shtetit të Kosovës përgjigjuni në mënyrë institucionale përmes mjeteve dhe formave të duhura. Andaj, e isha këtu që të alarmoj situatën, ta kthej fokusin tek situata emergjente, tek kjo padrejtësi, dhe me shumë korrektësi, me shumë respekt, në emër të Partisë Demokratike të Kosovës, edhe Kryesisë së Kuvendit, i kërkova që fillimisht edhe pse shumë e vonuar, Kuvendi i Republikës së Kosovës ta ketë një deklaratë të përbashkët dhe u dakorduan që ta kemi një deklaratë të përbashkët në seancën që do të bëhet ditën e hënë", ka deklaruar ai. Veç deklaratës së paralajmëruar për fillim të javës së ardhshme, deputeti i PDK-së ka vënë inatin kryesor te hapat konkretë ligjorë, duke theksuar se fokusi i presionit duhet të zhvendoset te Qeveria. "Po më e rëndësishme se sa deklarata është projektligji, nisma ligjore, të cilën ne tashmë veç e kemi bërë, kemi dorëzuar në Kuvendin e Kosovës, dhe prej Kuvendit të Kosovës nisma ka shkuar në Qeverinë e Republikës së Kosovës. Andej, tash, presioni e kërkesa e të gjithëve duhet të jetë te Qeveria e Republikës së Kosovës. Unë këtë kërkesë dhe këtë presion e bëj edhe sot, në mbledhjen e Kryesisë. Kryetarja Haxhiu u zotua se personalisht do të angazhohet të diskutoj me kryeministrin Albin Kurti që kjo të bëhet", u shpreh Tahiri.