Nderim legjendës Aziz Salihu: Prishtina bëhet gati për turneun ndërkombëtar të boksit

Federata e Boksit e Kosovës (FBOXK) ka bërë të ditur detajet për një nga ngjarjet më të rëndësishme sportive të kalendarit të saj për vitin 2026. Bëhet fjalë për Turneun Ndërkombëtar të Boksit, i cili do të mbahet në shenjë nderimi për emrin e madh të sportit tonë, legjendën Aziz Salihu, i shpallur ndër vite si sportisti i shekullit. Organizimi i këtij turneu, i titulluar “Shqiptarët në Boks janë Histori, Zizi Olimpik”, i është besuar Klubit të Boksit “Prishtina”. Ky aktivitet synon të nderojë kontributin e jashtëzakonshëm të Salihut në ringjet ndërkombëtare, duke bashkuar emra të njohur të boksit dhe talente të reja. Ngjarja do të zhvillohet më 3 tetor 2026 në ambientet e hapura të Amfiteatrit në sheshin “Zahir Pajaziti” në Prishtinë, me fillim nga ora 15:00. Përpara përballjeve zyrtare, procesi i peshimit të boksierëve do të organizohet në palestrën e KB “Prishtina”, në intervalin kohor nga ora 11:00 deri në 12:00. Ky turne nuk do të jetë vetëm një garë lokale, pasi pjesëmarrja e boksierëve nga vendet e rajonit i jep atij karakter ndërkombëtar. Ky organizim shihet si një mundësi ideale për shkëmbim përvojash sportive dhe një platformë për promovimin dhe rritjen e cilësisë së boksit në vend.