Kushtëzimi i integrimit të Serbisë: BE-ja kërkon zbardhjen e fatit të të pagjeturve dhe hapjen e arkivave

Ekonomisti austriak dhe drejtuesi i Komitetit Austriak për Zgjerimin e NATO-s, Günther Fehlinger-Jahn, ka kërkuar një qasje më rigoroze nga Bashkimi Evropian ndaj Serbisë. Sipas tij, procesi i integrimit evropian të këtij shteti duhet të jetë i lidhur ngushtë me bashkëpunimin e plotë për zbardhjen e fatit të personave të zhdukur gjatë luftës në Kosovë, duke përfshirë hapjen e arkivave shtetërore dhe lokalizimin e varrezave të fshehura. “Integrimi evropian i Serbisë duhet të kushtëzohet nga gatishmëria e saj për të ofruar dokumentacion të plotë historik, si dhe për të bashkëpunuar pa rezerva në gjetjen e trupave të personave të pagjetur”, theksoi Fehlinger-Jahn. Duke iu drejtuar kryetarit të SNS-së, Millosh Vuçeviç, në lidhje me arrestimin e nëntë personave në Zubin Potok, Fehlinger-Jahn ka kërkuar që pretendimet për pafajësinë e tyre të trajtohen përmes rrugëve ligjore dhe jo përmes diskursit politik. Ai nënvizoi se nëse ka pretendime për prova të fabrikuara apo shkelje të të drejtave nga ana e Policisë së Kosovës, ato duhet të dëshmohen me fakte konkrete në gjykatë. Sipas ekspertit austriak, retorika politike, duke përfshirë termat si “terror” apo “spastrim etnik”, nuk mund të zëvendësojë provat materiale dhe forenzike. Ai ka tërhequr vërejtjen se kalendari zgjedhor i Serbisë nuk mund të ndikojë në rrjedhën e hetimeve penale në Kosovë, duke kërkuar që përgjigjet ndaj propagandës të bëhen vetëm përmes dokumenteve të verifikueshme, analizave të ADN-së dhe së drejtës ndërkombëtare. Në një thirrje për vigjilencë, veçanërisht gjatë muajit tetor, Fehlinger-Jahn ka kërkuar që fokusi të mbetet te e vërteta dhe dinjiteti i familjeve të viktimave. Ai kërkon zbardhjen e zinxhirit të përgjegjësisë për çdo krim të kryer dhe kthimin e viktimave në familjet e tyre. “Pas 27 vitesh, koha për drejtësi është tani. Asnjë arkiv nuk duhet të mbetet i mbyllur dhe asnjë viktimë nuk duhet të harrohet. E vërteta dhe drejtësia e bazuar në prova janë hapat e domosdoshëm përpara çdo procesi të pajtimit”, përfundoi Fehlinger-Jahn.