Protesta e 15-të: Haziri akuzon Kurtin për indiferencë ndaj historisë së UÇK-së

Sheshi “Skënderbeu” në Prishtinë është mbushur sërish nga mijëra qytetarë, të cilët në natën e 15-të të protestës “Jo në emrin tim”, kanë shprehur revoltën e tyre ndaj qasjes së Qeverisë së Kosovës. Thirrjet “marre” kanë jehuar në shenjë pakënaqësie ndaj vonesave të ekzekutivit për t’u përgjigjur mbi iniciativën për ndryshimin e Ligjit për Dhomat e Specializuara, e cila ka mbetur në sirtarët qeveritarë prej një jave. Çlirim Haziri, njëri ndër organizatorët e kësaj proteste, ka vlerësuar se problemi thelbësor i Qeverisë është mungesa e ndjeshmërisë ndaj vlerave të luftës. Sipas tij, trajtimi i historisë së UÇK-së si një procedurë burokratike apo si një dosje e thjeshtë në tavolinë, dëshmon për një shkëputje nga amaneti i lirisë. Haziri e ka cilësuar si “të frikshëm” komoditetin me të cilin kryeministri Albin Kurti u shpreh të mërkurën lidhur me këtë nismë ligjore. “Kryeministri flet me një qetësi që të ngjall frikë, duke thënë se do të përgjigjet brenda kësaj jave, ndërkohë që kanë kaluar 15 ditë nga aktgjykimi që goditi historinë e UÇK-së dhe një javë nga dorëzimi i iniciativës në zyrën e tij”, u shpreh Haziri para protestuesve. Ai shtoi se koha po kalon shpejt dhe se qasja e kryeministrit, i cili e trajton çështjen sikur të ishte një mbledhje e zakonshme pune, është e papranueshme. “Kulla po lëkundet, ndërsa kryeministri vepron sikur ka gjithë kohën e botës në dispozicion”, theksoi Haziri. Nga ana tjetër, kryeministri Albin Kurti, i pyetur të mërkurën për vonesat në procedimin e kësaj nisme, ka deklaruar se çështja është në rrugën e duhur institucionale. Ai sqaroi se iniciativa e PDK-së është duke u shqyrtuar nga zyra ligjore e Kryeministrisë, duke e cilësuar këtë si një procedurë të rregullt. Kurti ka siguruar se nuk ka nevojë për shkelje procedurale dhe se pas përfundimit të vlerësimeve, përgjigjja do t’i dërgohet Kuvendit. “Të gjitha këto përmbyllen këtë javë dhe do t’i drejtohemi Kuvendit”, ka deklaruar kreu i Qeverisë.