Kombëtarja merr frenat e grupit: Dy avantazhe madhore në horizont për Kampionatin Europian

Falë kombinimit të rezultateve në ndeshjet e dyta të grupit në Ligën e Kombeve, Kombëtarja shqiptare e futbollit ngjitet e vetme në kryesim, duke marrë në dorë fatin e saj për sa i përket kalimit në Ligën C. Kuqezinjtë gëzojnë një epërsi prej dy pikësh ndaj Finlandës, kundërshtarit me të cilin do të përballen këtë fundjavë, një mundësi e artë kjo për të siguruar kreun e grupit dhe për të përfituar avantazhe kyçe drejt Kampionatit Europian 2028. Sipas simulimeve të përditësuar nga superkompjuteri i specializuar “Football Meets Data”, shanset e Shqipërisë për të triumfuar në grup janë rritur ndjeshëm në 72,4%, krahasuar me kuotën 62,6% që mbanin pak ditë më parë. Po kështu, mundësia e ngjitjes përmes vendit të parë apo fazës “play-off” është ngritur nga 75% në 82,9%, duke rritur ndjeshëm gjasat për një kalim të sigurt në Ligën B në edicionin e ardhshëm. Mbyllja e grupit në vendin e parë i siguron skuadrës kombëtare dy shpërblime jetike në optikën e Europianit 2028. Së pari, ky pozicionim garanton minimalisht një vend në “play-off” të turneut kontinental. Së dyti, triumfi në grup i siguron Shqipërisë pozicionimin në vazon e tretë gjatë shortit për eliminatoret e ardhshme. Në krahun tjetër, përfundimi i grupit në vendin e dytë do ta rrëzonte automatikisht përfaqësuesen kuqezi në vazon e katërt, duke komplikuar ndjeshëm rrugën drejt kualifikimit.