Betejë ligjore në Britani: Rita Ora përballet me padinë milionëshe të ish-menaxheres

Ylli i njohur i muzikës pop, Rita Ora, është përfshirë në një çështje gjyqësore me ish-menaxheren e saj, Sarah Stennett. Sipas pretendimeve të ngritura, kompania e kësaj të fundit, FAE Ventures, kërkon një shifër prej më shumë se 3.2 milionë paundësh si detyrim i pashlyer nga artistja. Sipas shkresave të depozituara në Gjykatën e Lartë të Mbretërisë së Bashkuar, pretendohet se interpretuesja ka shkelur detyrimet kontraktuale duke mos i transferuar kompanisë përqindjen e përcaktuar nga fitimet e realizuara në turnetet muzikore dhe angazhimet në televizion. Sarah Stennett, e cila ka qenë mentore dhe drejtuese e karrierës së Ritës që prej vitit 2009, i dha fund bashkëpunimit profesional me këngëtaren gjatë vitit 2024. Megjithëse ndarja fillimisht u duk se ndodhi në paqe, tashmë marrëdhënia e tyre ka kaluar në një fazë të mprehtë konflikti juridik. Në fokus të padisë janë mbi 1.7 milionë paund, të cilat sipas FAE Ventures përbëjnë “zbritje të palejueshme” të aplikuara për shërbime të ndryshme profesionale, ku përfshihen konsulenca financiare, marketingu dhe sigurimet. Gjithashtu, në dosjen gjyqësore theksohet se mbi 1.1 milionë paund të ardhura nga “Phoenix World Tour” kanë mbetur të padeklaruara. Ky turne, i cili u mbajt përgjatë viteve 2019 dhe 2020, përfshinte shtatë shfaqje në stadiume e arena anembanë Mbretërisë së Bashkuar, përfshirë një koncert madhështor në “O2 Arena” të Londrës. Sipas pretendimeve të kompanisë, komisionet përkatëse nuk pasqyrojnë të gjitha të ardhurat që ylli shqiptar ka përfituar ose që janë arkëtuar në emër të saj në atë periudhë. Madje, dokumentet flasin për të ardhura nga koncertet që arrinin deri në 6 milionë paund, të cilat nuk figurojnë në pasqyrat përkatëse. Pjesë e kësaj përplasjeje financiare është bërë edhe angazhimi televiziv i këngëtares. Kompania pretendon se honoraret e Ritës nga pozicioni i saj si anëtare e jurisë në edicionin e pestë të spektaklit “The Masked Singer” nuk janë raportuar me saktësi, duke u shoqëruar me fatura që nuk i përgjigjeshin shifrave reale kontraktuale. Për të hedhur dritë mbi këto dyshime, ekipi i Sarah Stennett kishte kërkuar më parë qasje në librat e llogarive të këngëtares. Një ent i specializuar në auditimin e industrisë muzikore kishte shqyrtuar bilancet e saj për një periudhë gjashtëvjeçare, nga korriku i vitit 2018 deri në qershor të vitit 2024. Pavarësisht kësaj, pala paditëse pretendon se gjatë këtij kontrolli atyre iu vunë në dispozicion vetëm një pjesë e dokumentacionit të kërkuar zyrtarisht. Deri në këto momente, Rita Ora nuk ka paraqitur ende një kundërpërgjigje apo mbrojtje zyrtare ndaj këtyre akuzave në rrugë ligjore. Vlen të theksohet se pretendimet e ngritura në dokumentet e gjykatës janë pjesë e procedurës paraprake dhe ende nuk përbëjnë një vendim përfundimtar të drejtësisë britanike.