Diplomati francez: Dialogu me Serbinë është çelësi i stabilitetit dhe integrimit evropian të Kosovës

Ambasadori i Francës në Kosovë, Jean-François Huchet, ka vlerësuar se procesi i zgjerimit të Bashkimit Evropian është rikthyer fuqishëm në fokusin e agjendës strategjike të kontinentit, duke u shndërruar në një domosdoshmëri të mirëfilltë gjeopolitike. Gjatë fjalës së mbajtur në Prishtinë në kuadër të tryezës së diskutimit me titull “Qëndrimet e kryeqyteteve evropiane ndaj zgjerimit: perspektivat, prioritetet dhe rruga e Kosovës drejt BE-së”, Huchet vuri në dukje se për një kohë të gjatë zgjerimi trajtohej kryesisht si një proces teknik. Megjithatë, ai theksoi se agresioni ushtarak i Rusisë në Ukrainë ka transformuar rrënjësisht këndvështrimin ndaj kësaj çështjeje. Diplomati francez kujtoi se mbi të gjitha, projekti i Bashkimit Evropian përfaqëson një nismë paqeje, sigurie dhe stabiliteti për të gjithë evropianët. “Zgjerimi është bërë domosdoshmëri gjeopolitike, mënyrë e përafrimit të Ballkanit Perëndimor fuqishëm brenda Evropës”, u shpreh Huchet. Ai shtoi se Parisi zyrtar mbështet fuqimisht një proces zgjerimi që bazohet në merita individuale, duke bërë thirrje që njëkohësisht edhe blloku evropian të përgatisë institucionet, politikat dhe kornizën buxhetore për të përballuar një anëtarësim më të gjerë. Në lidhje me perspektivën evropiane të Kosovës, ambasadori francez bëri të aformur se ky proces meriton të trajtohet përmes një debati të brendshëm në vend, krahas diskutimeve që zhvillohen në qendrat vendimmarrëse evropiane. “Kosova ka ndërmarrë hapa të rëndësishëm, ka aplikuar për anëtarësim, qytetarët kanë marrë udhëtimin pa viza në zonën Schengen, një arritje shumë konkrete evropiane”, tha ai. Ndonëse i cilësoi këto zhvillime si pozitive, Huchet theksoi se hapat e ardhshëm kërkojnë reforma të thella e të qëndrueshme në fushën e sundimit të ligjit, konsolidim të institucioneve dhe një përkushtim të palëkundur ndaj procesit të bisedimeve me Beogradin. Sipas tij, dialogu me fqinjin verior mbetet një kusht esencial si për sigurinë rajonale, ashtu edhe për suksesin e rrugëtimit evropian të Kosovës. “Franca qëndron e gatshme që ta përcjellë këtë proces si partner dhe si mik i Kosovës”, deklaroi Huchet, duke përmendur gjithashtu vizitën e fundit në kryeqytetin kosovar të ministrit francez Benjamin Haddad. Një tjetër element kyç që prekur në fjalën e tij ishte siguria energjetike, e cila, sipas tij, tashmë është e ndërthurur ngushtësisht me ecurinë e zgjerimit të BE-së. Huchet shpjegoi se sfida të tilla si garantimi i furnizimit me energji, procesi i dekarbonizimit, modernizimi i sistemeve dhe ndërlidhja me tregjet evropiane kërkojnë bashkëpunim të ngushtë rajonal, infrastrukturë të përbashkët dhe investime serioze. Në fund, ambasadori francez nënvizoi se këto sfida nuk mund të kapërcehen të izoluara nga një shtet i vetëm, por kërkojnë bashkërendim të ngushtë të politikave në nivel evropian dhe rajonal.