ASH kërkon veprime konkrete nga Qeveria: Të kapet momenti evropian pas vizitës së Von der Leyen

Aleanca për Shqiptarët ka shprehur mirëseardhjen për vizitën e paralajmëruar të presidentes së Komisionit Evropian, Ursula von der Leyen, e cila do të vizitojë Shkupin më 2 tetor, duke u bërë thirrje institucioneve vendase që këtë vizitë ta shfrytëzojnë për të ndërmarrë hapa të prekshëm drejt Bashkimit Evropian. Sipas kësaj partie, ngjarje dhe takime të këtij niveli, si dhe zotimet që dalin prej tyre, kanë fuqinë të vulosin trajektoren e vendit për dekadën e ardhshme. "Fokusi i shtuar i Bashkimit Evropian ndaj Ballkanit Perëndimor duhet të na shërbejë si kambanë alarmi për të vepruar pa humbur kohë. Maqedonisë së Veriut i duhet një udhëheqje vizionare që arrin konsensuse, merr mbi vete barrën e përgjegjësisë dhe hap horizonte të reja. Çdo zvarritje e mëtejshme dëmton rëndë qytetarët, ekonominë kombëtare dhe besimin e rinisë se mund të ndërtojnë një të ardhme në vendin e tyre", thuhet në qëndrimin e partisë. Kryeministri Hristijan Mickoski dhe koalicioni qeveritar, sipas ASH-së, duhet t'i dalin përballë kësaj vizite me alternativa konkrete dhe vullnet të plotë politik për vendime madhore. Kjo forcë politike kërkon publikimin e një plani me afate të qarta kohore për realizimin e detyrimeve evropiane, ku përfshihen ndryshimet kushtetuese, reformat rrënjësore në drejtësi, lufta pakompromis kundër korrupsionit dhe funksionaliteti i shtetit ligjor. Menjëherë pas përfundimit të kësaj vizite, propozohet thirrja e një tryeze të përbashkët të të gjitha subjekteve politike parlamentare, me qëllim arritjen e një dakordance që do t'i japë impulse të reja procesit integrues. Përgjegjësia primare për këtë nismë bie mbi ekzekutivin, ndërsa kalkulimet e ngushta partiake duhet t'i lënë vendin bashkëpunimit shtetëror. Për Aleancën për Shqiptarët, rruga drejt Bashkimit Evropian është e pandashme nga standardet e barazisë, mbrojtja dhe respektimi i gjuhës shqipe, përfaqësimi i drejtë në institucione dhe siguria juridike për çdo qytetar. Këto paramente duhet të reflektohen në punën e përditshme të çdo dikasteri shtetëror, pasi një shtet që garanton mundësi të barabarta ngrit edhe kredibilitetin e tij ndërkombëtar. Ndërkohë, Plani i Rritjes dhe fondet e ofruara nga Brukseli përbëjnë një shans historik për zhvillimin ekonomik, të cilat duhet të përkthehen në investime reale, vende të reja pune dhe shërbime cilësore për qytetarët, gjë që kërkon administrata përgjegjëse dhe reforma me rezultate të dukshme, nënvizojnë nga ASH. Në përmbyllje, Aleanca për Shqiptarët thekson se do të mbështesë çdo nismë racionale dhe të përgjegjshme që e afron vendin me familjen evropiane, duke vlerësuar se ardhja e Ursula von der Leyen duhet të shërbejë si pikenisje për një angazhim të matshëm në zhbllokimin e eurointegrimeve.