Kosova bën hapin e madh: Nënshkruhet marrëveshja për integrimin e Parkut Industrial të Suharekës në tregun evropian

Gjatë punimeve të Konferencës së XV për Ekonominë 2026, e cila po mbahet në Mal të Zi, është kurorëzuar sot me nënshkrim Marrëveshja e Mirëkuptimit mes shteteve të Ballkanit Perëndimor dhe përfaqësuesve të Parqeve Industriale nga Bashkimi Evropian. Dokumenti zyrtar u firmos nga ushtruesja e detyrës së Drejtoreshës së APINK-së, Zana Kotorri, në përfaqësim të Kosovës, ndërsa institucioni kryesor përfitues nga kjo nismë do të jetë Parku Industrial në Suharekë. Kjo marrëveshje ka për qëllim ndërtimin e një platforme të përbashkët bashkëpunimi ndërmjet zonave industriale rajonale dhe atyre evropiane. Ajo synon të hapë horizonte të reja për zhvillimin e sipërmarrjeve, përfshirjen e tyre në zinxhirët evropianë të furnizimit dhe vlerës, si dhe të nxisë investimet dhe partneritetet strategjike. Po ashtu, nisma fokusohet te shkëmbimi i praktikave më të mira për zhvillimin e parqeve eko-industriale, ngritja e kapaciteteve drejtuese dhe përmirësimi i aftësive të fuqisë punëtore në funksion të tranzicionit digjital, të gjelbër dhe industrial. Për vendin tonë, ky hap përfaqëson një mundësi thelbësore për ndërkombëtarizimin e Parkut Industrial të Suharekës, duke e afruar atë me standardet e parqeve evropiane dhe duke i siguruar biznesit vendor qasje më të gjerë në tregjet e Bashkimit Evropian. Në të njëjtën kohë, ky zhvillim ndihmon ndjeshëm në transformimin e infrastrukturës industriale të Kosovës, duke e bërë atë më konkurruese, më të gjelbër dhe të ndërthurur ngushtë me ekonominë e përbashkët evropiane.