Ademi lëshon detajet: Kërkesa për lëndët e Hagës që dy vite në tryezën e Gjykatës Kushtetuese

Sekretari i Bashkimit Demokratik për Integrim (BDI), Arbër Ademi, i ftuar në emisionin “N’Dritë”, ka bërë të publike se çështja e rikthimit të dosjeve të Hagës që lidhen me konfliktin e vitit 2001 në Maqedoni, ndodhet e bllokuar në Gjykatë Kushtetuese tash e dy vjet. Gjatë prononcimit të tij, Ademi vuri në dukje se nismëtari i kësaj iniciative është pikërisht Pavle Trajanov, i cili aktualisht shërben si partner qeveritar i koalicionit VLEN. “Ka qarqe të caktuara që janë në qeveri, që janë partnerë të VLEN-it… Pavle Trajanovi para dy viteve, ne e dimë. Në qoftë se s’ka informacion zotëri Qoku, unë kam informacion”, u shpreh ndër të tjera zyrtari i lartë i BDI-së. Duke vazhduar fjalën e tij, ai shtoi se procesi ka ecur përpara në aspektin burokratik brenda institucionit të drejtësisë. “Dhe po ju them që është në Gjykatën Kushtetuese, madje në qoftë se dëshironi ta dini ka përgatitur edhe referatin për këtë çështje. Por unë e di se këta janë pa takat aty ku janë në qeveri, nuk janë të informuar për asgjë, s’dinë asgjë, s’i pyet askush”, përfundoi Ademi.