Thomas Waitz nga Shkupi: Pa drejtësi të barabartë për të gjithë, nuk ka besim në institucione

Përkushtimi ndaj luftës kundër korrupsionit, forcimi i sundimit të ligjit dhe përshpejtimi i reformave thelbësore vazhdojnë të jenë kushtet kyçe për rrugëtimin evropian të Maqedonisë së Veriut. Këto konkluzione dolën në pah gjatë punimeve të sesionit të 25-të të Komitetit të Përbashkët Parlamentar ndërmjet Bashkimit Evropian dhe Maqedonisë së Veriut, i cili po mbitet në Shkup. Autoritetet evropiane nënvizuan se rikthimi i besimit tek institucionet dhe garantimi i një drejtësie të barabartë janë vendimtare për të ndalur largimin e të rinjve dhe për të siguruar prosperitetin e vendit. Nga ana tjetër, delegacioni i Maqedonisë së Veriut rikonfirmoi se anëtarësimi në BE mbetet prioritet absolut kombëtar, duke kërkuar një proces pranimi të qartë, të parashikueshëm dhe të mbështetur te meritokracia. Eurodeputeti dhe raportuesi i përhershëm i Parlamentit Evropian për vendin, Thomas Waitz, gj9fjalës së tij theksoi se sfidat me korrupsionin ekzistojnë kudo në Evropë, por diferencën e bën reagimi i shtetit ligjor. "Të gjitha shtetet anëtare të BE-së po luftojnë korrupsionin dhe asnjëra prej tyre nuk është perfekte. Puna është për të forcuar sundimin e ligjit, por ka dallime në nivelin e korrupsionit midis vendeve. Edhe në Austri ka raste të mëdha korrupsioni, por ndryshimi është se shumë njerëz të pasur përfundojnë gjithashtu para drejtësisë," deklaroi Waitz. Duke vënë theksin te Agjenda e Reformave, eurodeputeti u bëri thirrje autoriteteve që të përmbyllin ndryshimet në Kodin Penal, hap i domosdoshëm që do t'i hapë rrugë vendit për të tërhequr fondet evropiane të ndërlidhura me reformat. "Ekziston një parim në Planin e Rritjes sipas të cilit, nëse një vend nuk i zbaton reformat në kohë, fondet mund të ridrejtohen te vendet fqinje. Për aq sa jam i informuar, Maqedonia e Veriut ka një mundësi reale për të marrë fonde shtesë, ndoshta 70 deri në 80 milionë euro. Por nuk bëhet fjalë vetëm për para. Qytetarët kanë nevojë për një Kod Penal që do të sigurojë një sistem efikas drejtësie dhe do të ngjallë besim në institucione," u shpreh ai. Në fund, Waitz shtoi se drejtësia funksionale kërkon zbathjen e rregullave pa dallim dhe zhdukjen e kulturës së pandëshkueshmërisë për individët me pushtet. Sipas tij, sigurimi i pagave dinjitoze për gjyqtarët dhe punonjësit e policisë përbën gjithashtu një nga instrumentet më efikase parandaluese kundër dukurive korruptive.