Reforma në drejtësi nën lupë: KDI akuzon Komisionin për Legjislacion për shkelje procedurash

Instituti Demokratik i Kosovës (KDI) ka drejtuar kritika të ashpra ndaj Komisionit për Legjislacion, duke vlerësuar se ky organ e ka nisur aktivitetin e tij në kundërshtim të hapur me Rregulloren e Kuvendit. Sipas reagimit zyrtar, komisioni në fjalë ka shqyrtuar dhe votuar në parim pakon e projektligjeve për reformën në drejtësi, duke shkelur dispozitat e parapara në Rregulloren e Punës së ligjvënësve. “Fillimisht, neni 34 (4) i Rregullores përcakton se, përveç rasteve të veçanta, mbledhja e komisionit thirret së paku tri ditë pune para mbajtjes së saj. Në rastin e sotëm, deputetët kanë pranuar pakon e projektligjeve dhe materialet përcjellëse prej qindra faqesh mbrëmë, ndërsa janë ftuar që sot t’i diskutojnë dhe votojnë ato në parim. Për këtë procedim të përshpejtuar nuk është dhënë paraprakisht ndonjë arsyetim”, theksohet në njoftimin e KDI-së. Po ashtu, organizata ka shprehur shqetësim edhe rreth modaliteteve të shqyrtimit, duke vënë njoft se nismat ligjore morën dritën jeshile pa u prezantuar fare nga ministrja përkatëse. Megjithëse prania e ministres përbën një praktikë të mirë parlamentare dhe jo një detyrim strikt procedural, KDI argumenton se për një pako kaq kapitale për sistemin e drejtësisë, ajo do të duhej domosdoshmërisht të paraqitej para deputetëve për të bërë prezantimin dhe për t'iu përgjigjur pyetjeve të mundshme. Duke iu referuar nenit 74 (1) të Rregullores së Kuvendit, KDI kujton se shqyrtimi i parë në seancë plenare duhet të zhvillohet vetëm pas kalimit të afatit prej dy javësh nga momenti i shpërndarjes së projektligjeve te ligjvënësit. “Pra, Komisioni kishte kohë që ta zhvillonte shqyrtimin në parim duke respektuar afatin e rregullt për thirrjen e mbledhjes dhe duke u dhënë deputetëve mundësi reale për t’i shqyrtuar materialet”, shtohet tutje në komunikatë. Duke e konsideruar këtë pako si tejet kyçe për ngritjen e integritetit, llogaridhënies dhe performancës në sistemin e drejtësisë, instituti vlerëson se i gjithë procesi nuk duhet të karakterizohet nga ngutia, por nga zbatimi rigoroz i Rregullores së Kuvendit. “KDI pret që Komisioni për Legjislacion, i cili është përgjegjës për të garantuar zbatimin e drejtë të Rregullores së Kuvendit, t’i zhvillojë fazat e mëtejshme të shqyrtimit të kësaj pakoje duke respektuar plotësisht procedurat parlamentare dhe duke siguruar përfshirjen e akterëve relevantë”, përmbyllet reagimi i KDI-së.