Refuzimi nga familjarët e krerëve të UÇK-së, Albulena Haxhiu flet për takimin e anuluar dhe protestat

Ushtruesja e detyrës së Presidentes, Albulena Haxhiu, ka bërë të ditur se familjarët e ish-liderëve të Ushtrisë Çlirimtare të Kosovës (UÇK), të cilët po ballafaqohen me gjykimin në Hagë, kanë vendosur të mos i përgjigjen ftesës së saj për një takim zyrtar. Ajo ka theksuar se e kupton dhe e respekton plotësisht vendimin e tyre, duke shtuar se synimi i kësaj nisme ishte dëshmimi i mbështetjes institucionale ndaj halleve dhe kërkesave që ata kanë në këtë periudhë të ndjeshme. “Arsyeja pse kam konsideruar që është e rëndësishme të takohem me familjarët, sepse vlerësoj që në situatën në të cilën jemi, po flas për institucionin e Presidencës, të takohet me familjarët dhe të shpreh mbështetjen tonë për kërkesat dhe nevojat e tyre. Ata nuk kanë dashur, e respektoj vendimin e tyre”, ka theksuar Haxhiu. Pavarësisht këtij refuzimi, ajo ka lënë të hapur derën e bashkëbisedimit për të ardhmen, duke u shprehur e gatshme për t'i pritur në zyrën e saj ose për t'i vizituar vetë në mjediset e tyre familjare. “Jam e gatshme t’i pres në çdo moment që ata dëshirojnë ose të shkoj në vizita familjare. Kam zgjedhur që paraprakisht t’i pres në institucion, që të dërgojmë mesazh institucional”, ka sqaruar ajo. Gjatë prononcimit të saj, Haxhiu është ndalur edhe te reagimet e qytetarëve pas vendimit të fundit të Gjykatës Speciale, duke u dhënë mbështetje protestave të organizuara. “I mbështes protestat qytetare, do të shqetësohesha që pas vendimit në Hagë të mos kishte protesta. I përgëzoj qytetarët”, ka përfunduar ajo.