Thellohet partneriteti ndërkombëtar: Drejtori i Policisë së Kosovës, Gazmend Hoxha, në selinë e EUROPOL-it në Hagë

Një delegacion i nivelit të lartë nga Policia e Kosovës, nën drejtimin e kryepolicit Gazmend Hoxha, ka marrë pjesë aktive në Konventën Vjetore të Shefave të Policisë, ngjarje kjo e organizuar në selien qendrore të EUROPOL-it në qytetin e Hagës. Gjatë punimeve të kësaj konvente, vëmendja kryesore i është kushtuar sfidave globale të sigurisë, duke trajtuar në detaje fushat e bashkëpunimit për frenimin e trafikimit të narkotikëve, goditjen e krimeve kibernetike, parandalimin e pastrimit të parave, si dhe adresimin e abuzimeve me shërbimet financiare digjitale dhe dukuritë e tjera bashkëkohore të krimit ekonomik. Në kuadër të kësaj vizite zyrtare në shtetin holandez, delegacioni kosovar ka zhvilluar një takim zyrtar edhe në Ambasadën e Kosovës, ku janë pritur ngrohtësisht nga ambasadori Dren Doli. Në këtë takim është vënë theksi te rëndësia e fuqizimit të mëtejshëm të mekanizmave të sigurisë dhe intensifikimit të bashkëpunimit mes Policisë së Kosovës dhe organizmave ndërkombëtare të zbatimit të ligjit.