Flakë dhe tym i dendur në Durrës, zjarrfikësit ndërhyjnë në pikën e skrapit në Fllakë

Një incident i rëndë zjarrvënieje ka regjistruar alarm në zonën industriale të Fllakës në Durrës, ku një aktivitet privat është përfshirë nga flakë të fuqishme. Skena është pushtuar nga një re e dendur tymi dhe gjuhë zjarri, ndërkohë që në terren janë angazhuar një numër i lartë efektivësh të shërbimit zjarrfikës nga qyteti i Durrësit dhe Shijaku, të cilët po vijojnë përpjekjet intensive për neutralizimin dhe izolimin e flakëve. Sipas informacioneve paraprake, bëhet fjalë për një subjekt tregtar që ushtron veprimtarinë e tij në fushën e grumbullimit dhe riciklimit të mbetjeve metalike (skrap). Autoritetet ende nuk kanë dalë me një konkluzion zyrtar lidhur me shkaqet që kanë shkaktuar këtë vatër zjarri, ndërsa vijojnë verifikimet nëse ka pasur punonjës të lënduar gjatë këtij incidenti.