Zhvillimet e fundit në Kuvend: Të hënën seanca plenare, Haxhiu sqaron procedurat për Specialen

Kryetarja e Kuvendit të Kosovës, Albulena Haxhiu, ka adresuar çështjen e mungesës së një seance të jashtëzakonshme, pas vendimit të fundit të nxjerrë nga Dhomat e Specializuara në Hagë. Duke iu referuar dispozitave të Rregullores së Punës së Kuvendit, ajo ka bërë të ditur se deri në këtë fazë nuk ka mbërritur asnjë kërkesë zyrtare për thirrjen e një seance të jashtëzakonshme. Ndërkohë, Haxhiu ka konfirmuar se punimet e radhës parlamentare do të zhvillohen të hënën, ku fokusi kryesor pritet të jetë miratimi i një deklarate të përbashkët të institucionit ligjvënës lidhur me zhvillimet në Hagë. “Kryesia e Kuvendit vendosi që seanca e radhës të mbahet të hënën, në orën 11:00, me pikla të rëndësishme të rendit të ditës. Së pari me btimin e deputetëve të rinj, pastaj me miratimin e një deklarate që lidhet me procesin ën Hagë, përkatësisht me vendimin e padrejtë të Gjykatës Speciale. Jemi dakorduar që paraprakisht të mos vendosen deputete para një akti të kryer, mirëpo që të kontribuojmë në draftimin e kësaj deklarate. Të jetë një qëndrim i Kuvendit. Deklaratat nuk kanë peshë juridike, por të jetë një qëndrim i Kuvendit”, u shpreh ajo. Duke hedhur poshtë çdo pretendim se ajo ka refuzuar thirrjen e një seance të tillë, Haxhiu theksoi se veprimet e saj udhëhiqen rreptësisht nga normat rregullatore dhe se mungesa e kërkesës e bën të pamundur një hap të tillë nga ana e saj. “Po ashtu, në raport me këtë, më lejoni që të sqaroj që janë bërë kritika pse nuk kam thirrur një seancë pas vendimit të Hagës. Nuk ka pasur asnjë kërkesë për një seancë të jashtëzakonshme. Sipas rregullores, kryetarja e Kuvendit nuk ka të drejtë të thërrasë seancë të jashtëzakonshme”, shtoi ajo.