Fati i pallateve të bllokuara: AAPSK zbulon planin financiar për objektet e pambaruara të investitorëve të falimentuar

Çfarë ndodh realisht me një pronë pasi ajo kalon në duart e shtetit dhe kush merr përsipër kostot për të finalizuar një ndërtim në rast se kompania përgjegjëse falimenton apo shuhet plotësisht? Këto pikëpyetje ngritën shqetësimin kryesor gjatë diskutimeve parlamentare. Këtë dilemë e shtroi për diskutim deputeti i Partisë Socialiste, Damian Gjiknuri, gjatë seancës shqyrtuese në Komisionin e Ligjeve lidhur me projektligjin e ri për menaxhimin e pasurive të sekuestruara dhe konfiskuara. Nismosja e re ligjore parashikon shtrirjen e efekteve të saj edhe te pronat e konfiskuara nga njësitë e qeverisjes vendore, duke i kthyer ato në shërbim të komunitetit. Në përgjigje të këtyre shqetësimeve, kryeadministratorja e Agjencisë së Administrimit të Pasurive të Sekuestruara dhe Konfiskuara (AAPSK), Reisena Xhaja, dha garanci të plota për ngritjen e një mekanizmi financiar specifik që do t'i japë zgjidhje përfundimit të këtyre objekteve. “Në eksperiencën që kemi aktualisht, kemi arritur eksperiencën e mjaftueshme për të menaxhuar shoqëritë e ndërtimit. Kemi 5 shoqëri ndërtimi që i kemi në proces administrimi dhe po finalizojmë procedurat e dorëzimit të pasurive. Nuk ka njerëz që kanë blerë pasuri dhe janë zhgënjyer nga ky proces. Kemi një eksperiencë të ngjashme. E parashikuar te ligji 66 dhe te fondi i posaçëm nga ndërtimet pa leje do mbushet me të ardhura, do paguhen parablerësit, praktikisht do kemi të ardhura. Që para 3 viteve vlerësimi që u bë 15 milionë euro dhe fondi do mbushet”, deklaroi Reisena Xhaja. Në rast se burimet e këtij fondi rezultojnë të pamjaftueshme për të mbuluar kostot e plota të projektit, agjencia ka gati një plan alternativ, i cili konsiston te sekuestrimi i aseteve të tjera në pronësi të investitorit, zhvilluesit apo subjekteve të tjera me përgjegjësi ligjore. Ndërkohë, faza e zbatimit të punimeve do të zhvillohet përmes mekanizmave zyrtarë të prokurimit publik. “Nga ky fond, nëse s’do ketë mundësi financiare investitori, zhvilluesi, kolauduesi, ne do kalojmë në sekuestrimin e pasurive të tyre. Kemi menduar si formulë. Procedurat e tjera më pas do të kryhen nëpërmjet prokurimit publik, nëpërmjet OBP”, u shpreh më tej kryeadministratorja e AAPSK-së. Nga krahu tjetër, përfaqësuesit e opozitës kërkuan gjatë seancës që fokusi kryesor i legjislacionit të orientohet drejt përcaktimit të qartë të destinacionit përfundimtar për këto pasuri të konfiskuara. Paketa e re ligjore mori dritën jeshile në Komisionin e Ligjeve. Këto ndryshime synojnë t'i japin shtetit kontroll dhe rol vendimarrës në menaxhimin e pasurive, duke përfshirë që nga pallatet e lëna në gjysmë të rrugës, pasuritë që nxirren në ankand, e deri te trajtimi i kriptomonedhave.