Haxhiu i kthen përgjigje PDK-së për Specialen: S’ka mbështetje për nisma fasadë

Kryetarja e Kuvendit, Albulena Haxhiu, ka komentuar projektligjin e dorëzuar nga Partia Demokratike e Kosovës lidhur me Gjykatën Speciale, duke theksuar se nuk do t'i japë mbështetje nismave që shërbejnë vetëm për të krijuar perceptimin se diçka po ndërmerret, pa pasur ndonjë peshë reale. Gjatë paraqitjes para mediave në përfundim të mbledhjes së Kryesisë së Kuvendit, ajo u shpreh se nuk e ka ndërmend ta paragjykojë këtë propozim të opozitës, mirëpo kërkoi që veprimet institucionale të kenë qëllim konkret dhe substancë. "Refuzoj të mbështes çfarëdo iniciative që ka për qëllim veç me u duk që po bëjmë diçka. Nuk po du me paragjyku nismën e PDK-së", u shpreh Haxhiu para gazetarëve. Tutje, ajo potencoi se pas shpalljes së vendimit të shkallës së parë nga ana e Dhomave të Specializuara në Hagë, të gjithë faktorët institucionalë duhet të tregojnë maturi dhe kujdes të shtuar në hapat e tyre. "Në këtë fazë, pas vendimit të padrejtë të shkallës së parë, secili nga ne duhet të jemi të kujdesshëm", shtoi ajo. Në fund, kryeparlamentarja u drejtoi një apel të qartë të gjitha subjekteve politike dhe grupeve parlamentare që të përmbahen nga propozimet që bëhen thjesht për efekte optike pa pasur ndikim thelbësor. "I ftoj grupet që të mos bëjnë propozime vetëm sa për t’u dukur që megjithatë po bëjmë diçka dhe nuk kanë ndonjë peshë", përfundoi Haxhiu.