Hapi i madh drejt drejtësisë: Komisioni jep dritën jeshile për Byronë Shtetërore dhe paketën e reformave

Ministrja e Drejtësisë, Donika Gërvalla, ka bërë të ditur se Komisioni për Legjislacion ka miratuar zyrtarisht Projektligjin për Byronë Shtetërore, si dhe pesë projektligjet e tjera që përbëjnë Pakon e Reformës në Drejtësi. Sipas Gërvallës, ky paketim prej gjashtë projektligjesh synon transformimin rrënjësor të sistemit të drejtësisë në vend, duke përfshirë luftimin e pasurisë së pajustifikueshme, ngritjen e integritetit dhe llogaridhënies së prokurorëve e gjyqtarëve, fuqizimin e Këshillave, si dhe forcimin e rolit të Akademisë së Drejtësisë. Ajo ka vlerësuar se ky zhvillim është fryt i një angazhimi kolosal dhe të pandalur institucional, i cili vjen pas dritës jeshile nga Qeveria dhe tashmë edhe nga Komisioni për Legjislacion, duke i afruar këto nisma një hap pranë shqyrtimit në Kuvendin e Kosovës. Duke e cilësuar këtë si një përmbushje të zotimeve afatgjata ndaj qytetarëve, ministrja u shpreh e bindur në mbështetjen e Kuvendit, duke ritheksuar se sundimi i ligjit dhe reforma në drejtësi janë procese të pakthyeshme që do të bëhen realitet.