Real Madridi pa Asencion për dy muaj e gjysmë: Mbrojtësi i nënshtrohet operacionit

Raúl Asencio do të përballet me një periudhë të gjatë mungese, pasi është vendosur që mbrojtësi t'i nënshtrohet një ndërhyrjeje kirurgjikale në kockën e këmbës së djathtë për të kaluar përfundimisht problemin fizik që e ka shqetësuar prej muajsh. Futbollisti i Real Madridit vuante nga një çarje në kockë, e cila nuk u përmirësua përmes trajtimit konservativ. Pas një mbledhjeje të përbashkët në Valdebebas mes vetë lojtarit, stafit teknik dhe mjekëve të klubit, u konkludua se operacioni ishte rruga e vetme për një zgjidhje rrënjësore. Ndërhyrja kirurgjikale është caktuar të mbahet të enjten. Si pasojë, Asencio do të qëndrojë jashtë fushave të blerta për afro dy muaj e gjysmë, çka nënkupton se rikthimi i tij pritet në fund të vitit ose në hyrje të vitit 2027. Ky dëmtim e gjen Real Madridin në një fazë mjaft të ndjeshme, aq më tepër kur dihet se mbrojtësi spanjoll nuk ka regjistruar ende asnjë minutë në ndeshje zyrtare këtë edicion, për shkak të një dëmtimi muskulor të pësuar në fund të korrikut. Edhe pse ai u rikthye mes të grumbulluarve në shtator dhe u ul në stol në tri sfidat e fundit, trajneri José Mourinho nuk pati mundësi ta aktivizonte. Tani, me këtë mungesë të re, situata në prapavijë komplikohet edhe më shumë, duke ngushtuar alternativat në dispozicion të stafit teknik.