Kriza për kreun e shtetit: Kurti këmbëngul te Sejdiu dhe kërkon urgjentisht dialog me opozitën

Kryeministri i Kosovës, Albin Kurti, ka riafirmuar më 30 shtator se profesor Bekim Sejdiu mbetet kandidati zyrtar i Lëvizjes Vetëvendosje për postin e presidentit, pavarësisht vendimit të këtij të fundit për t'u tërhequr nga gara. Gjatë një konference për media, vetëm gjashtë ditë para skadimit të afatit ligjor për zgjedhjen e kreut të ri të shtetit, kreu i ekzekutivit bëri thirrje për takime urgjente me opozitën. “Sa i përket kandidatit, ne e kemi kandidatin. Kandidati është profesor Bekim Sejdiu nga marrëveshja”, u shpreh Kurti para gazetarëve. Kujtojmë se më 31 gusht, Lëvizja Vetëvendosje dhe Lidhja Demokratike e Kosovës kishin dalë me një propozim të përbashkët për Sejdiun. Megjithatë, situata ndryshoi menjëherë të nesërmen, kur gjashtë deputetë nga radhët e LDK-së dolën publikisht kundër këtij emri. Përballë këtij ngërçi dhe mungesës së konsensusit parlamentar, ish-gjyqtari i Gjykatës Kushtetuese dhe ish-diplomati Bekim Sejdiu njoftoi tërheqjen e tij më 14 shtator. Nga ana e tij, kryeministri Kurti e vlerësoi largimin e Sejdiut si një pasojë direkte të moszbatimit të marrëveshjes politike, duke ia hedhur fajin gjashtë deputetëve të LDK-së. Ai theksoj se Lëvizja Vetëvendosje i qëndron besnike dakordësisë fillestare dhe nuk ka në plan të propozojë një emër tjetër, ndërkohë që mbetet e paqartë nëse ka pasur kontakte të reja me Sejdiun për ta bindur që të rikthehet në garë. Sipas aktgjykimit të Gjykatës Kushtetuese të datës 23 shtator, afati kushtetues prej 60 ditësh për zgjedhjen e presidentit ka nisur më 8 gusht dhe përfundon më 6 tetor. Nëse Parlamenti dështon të zgjedhë kreun e shtetit brenda këtij afati, Kosova rrezikon seriozisht të shkojë përsëri në zgjedhje të jashtëzakonshme. Kurti konfirmoi se është në kontakt të vazhdueshëm me liderin e Partisë Demokratike të Kosovës, Bedri Hamza, dhe atë të Lidhjes Demokratike të Kosovës, Lumir Abdixhiku, ndonëse nuk pati takime fizike më 29 dhe 30 shtator dhe nuk caktoi ndonjë datë konkrete për tryezën e re të bisedimeve. Megjithatë, ai e cilësoi si të domosdoshëm vazhdimin e dialogut politik. Optimizmi i kreut të qeverisë për arritjen e një kompromisi u mbështet te miratimi i deklaratës së Kuvendit më 28 shtator për procesin gjyqësor ndaj katër ish-krerëve të Ushtrisë Çlirimtare të Kosovës në Hagë, e cila mori 99 vota pro. Sipas tij, ky unitet tregon se partitë politike kanë kapacitet për të bashkëpunuar në temat e mëdha dhe se përplasjet e ashpra zgjedhore nuk i shërbejnë interesave të vendit. Zgjedhja e presidentit vazhdon të mbetet nyja gordiane e krizës politike në Kosovë, një çështje që pati shkaktuar zgjedhje të parakohshme edhe gjatë muajit qershor. Nëse ky proces dështon deri më 6 tetor, vendi do të përballet me ciklin e katërt të zgjedhjeve parlamentare brenda vetëm dy viteve. Ndërkohë, Partia Demokratike e Kosovës ka kushtëzuar vijimin e diskutimeve për çështjen e presidentit me miratimin e projektligjit të saj që synon ndryshimin dhe plotësimin e Ligjit për Dhomat e Specializuara. Pas takimit me Kurtin më 27 shtator, Bedri Hamza kishte bërë të qartë se palët nuk kishin diskutuar ende për emra të përveçëm, por se PDK-ja mbetet e hapur për tema të tjera nëse kalon nisma e saj ligjore.