Vënë në pranga dy persona për zjarrvënie në kryeqytet: Njëri prej tyre theu masën e sigurisë dhe kapet me thikë

Strukturat e Policisë së Tiranës kanë ndaluar dy persona të dyshuar si përgjegjës për incidente të ndryshme të zjarrvënies, të regjistruara në zonën e Kombinatit dhe në fshatin Prush. Gjatë ndërhyrjes, njëri prej të dyshuarve, i cili figuronte me masë shtrënguese “Arrest në shtëpi”, ka bërë përpjekje për t'i shpëtuar efektivëve, por është neutralizuar dhe kontrolluar, ku iu sekuestrua edhe një armë e ftohtë. Në pranga ka rënë 49-vjeçari me inicialet E. K., i akuzuar se i ka vënë flakën një sasie mbeturinash në sheshin “Garibaldi” në Kombinat. Përveç tentativës për t'u larguar nga vendngjarja sapo ka parë policinë, gjatë kontrollit të detajuar fizik, këtij shtetasi i është gjetur dhe sekuestruar në cilësinë e provës materiale një mjet prerës (thikë). Nga verifikimet e mëtejshme në sistem, ka rezultuar se 49-vjeçari ka shkelur masën e sigurisë “Arrest në shtëpi”, e cila ishte caktuar më parë ndaj tij për veprat penale të vjedhjes dhe mbajtjes pa leje të armëve të ftohta. Ndërkohë, në një aksion të ndarë, efektivët e Komisariatit të Policisë Nr. 6 kanë vënë në pranga shtetasin Sh. H., pasi dyshohet se ka ndezur qëllimisht zjarr në pronën e tij private që ndodhet në fshatin Prush. Për shkak të favorizimit nga kushtet atmosferike, flakët janë përhapur me shpejtësi duke përfshirë një sipërfaqe të konsiderueshme kodrinore të zonës, çka ka sjellë dëmtimin e fondit pyjor, konkretisht djegien e pishave, bimësisë spontane dhe pemëve të ndryshme. Këto ndërhyrje të suksesshme të policisë vijnë në kuadër të operacioneve të vazhdueshme për parandalimin, konstatimin dhe ndëshkimin e çdo rasti të krimeve mjedisore dhe zjarrvënieve të qëllimshme. Dokumentacioni i plotë procedural i është përcjellë tashmë Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme ligjore.