Nata e 15-të e protestës “Jo në emrin tim”: Ermal Fejzullahu, Alban Dudushi e Korab Shaqiri ngjiten sonte në skenë në Prishtinë

Emra të njohur të artit dhe medias do të jenë pjesë e tubimit të sotëm qytetar. Artisti i mirënjohur Ermal Fejzullahu, gazetari i njohur nga Shqipëria Alban Dudushi, si dhe kantautori Korab Shaqiri do t'i adresohen sonte qytetarëve në kuadër e natës së 15-të të protestës “Jo në emrin tim”, e cila do të zhvillohet në sheshin “Skënderbeu” në kryeqytet. Bazuar në agjendën e bërë publike për këtë mbrëmje, organizatori i kësaj nisme, Çlirim Haziri, do të ketë gjithashtu fjalën e tij, ndërsa recitimi i betimit të ushtarit do të kryhet nga veterani i Ushtrisë Çlirimtare të Kosovës, Fazli Muharremi. Kjo protestë është thirrur të mbahet mbrëmjen e sotme, më 30 shtator, duke filluar nga ora 21:00. Tubimi vazhdon serinë e kundërshtimeve ndaj vendimit të Gjykatës Speciale ndaj ish-udhëheqësve të UÇK-së, duke kërkuar njëkohësisht hapa konkretë institucionalë në mbrojtje të tyre. Ngjarja e mbrëmjes së sotme shërben si paralajmërim dhe paraprirje për protestën masive të caktuar për nesër, më 1 tetor, e cila do të nisë në orën 16:00 në të njëjtin shesh.