Kodi i ri penal, Rama: S’ka më arrest me burg për veprat nën 5 vite burgim

Kryeministri i vendit, Edi Rama, ka bërë publike risitë e paketës së projektndryshimeve në Kodin e Procedurës Penale, e cila vjen si pjesë e zhvillimeve në kuadër të Reformës në Drejtësi. Gjatë prezantimit, ai ka vënë theksin te domosdoshmëria e kufizimit të masës ekstreme të arrestit me burg. Kreu i ekzekutivit shpjegoi se procesi gjyqësor duhet të fokusohet te shqyrtimi paraprak i masave më të lehta të sigurisë, duke e trajtuar lirinë e individit si pikënisje. Sipas rregullave të reja, për akuzat që mbajnë një dënim deri në 3 vite nuk do të vendosen fare masa shtrënguese, ndërsa për ato që parashikojnë dënime nën 5 vite, dënimi me burgim paraprak do të përjashtohet. “Procedimi penal duhet të nisë nga zanafilla e lirisë, jo nga burgu si zanafillë. Gjykata duhet të nisë nga liria, të shqyrtojë masat më të buta, të nisë nga arresti në shtëpi. Për veprat me dënim 3 vjet, nuk do caktohen masa shtrënguese. Nën 5 vjet s’do të ketë arrest me burg. Natyra e veprës nuk do mjaftojë më. Rreziku duhet të jetë konkret dhe aktual. Gjykata duhet të bëjë vlerësim të pavarur dhe nëse kopjon argumentet e prokurorit, vendimi bëhet i pavlefshëm. Sa herë caktohet arresti, gjykata duhet të caktojë gjendjen pasurore. Çdo muaj prokurori duhet t’i raportojë gjykatës nëse arsyet e masës ekzistojnë. Paketa forcon edhe mbrojtjen e njerëzve me gjendje të cenueshme“, u shpreh Rama. Në fjalën e tij, kryeministri shtoi gjithashtu se praktika e deritanishme e ka kthyer paraburgimin në normë, ndërkohë që Kushtetuta e përcakton atë si mjetin e fundit. Ai e cilësoi këtë paketë ligjore si një përgjigje të mirëmenduar dhe të domosdoshme përballë sfidave reale të sistemit.