Kryeministri Kurti rendit tri pikat kritike ndaj vendimit të Gjykatës Speciale për ish-krerët e UÇK-së

Kryeministri i vendit, Albin Kurti, ka bërë publike tri vërejtjet e tij kryesore në lidhje me aktgjykimin dënues të Gjykatës Speciale ndaj ish-udhëheqësve të Ushtrisë Çlirimtare të Kosovës (UÇK). Gjatë fjalës së tij, kreu i ekzekutivit njoftoi se Qeveria është në pritje të një opinioni të detajuar ligjor nga Ministria e Drejtësisë dhe ajo e Financave, i cili ka të bëjë me mundësinë e plotësim-ndryshimit të Ligjit për Dhomat e Specializuara. Duke u ndalur te vërejtja e parë, kryeministri veçoi nocionin e “Ndërmarrjes së Përbashkët Kriminale”, për të cilin theksoi se kërkon korrigjim të domosdoshëm nga ana e Gjykatës së Apelit. Sa i përket pikës së dytë, Kurti kritikoi ashpër qasjen mono-etnike të kësaj gjykate dhe mungesën e theksuar të transparencës gjatë procesit gjyqësor. “Ju e dini që zëvendësministri i Punëve të Brendshme, Enver Dugolli, si i mbijetuar i Masakrës së Dubravës ka bërë një kallëzim penal në Dhomat e Specializuara, në mënyrë që ta trajtojnë edhe çështjen e Masakrës së Dubravës. Që nga prilli i vitit 2023, pra tri vjet e gjysmë, s’ka marrë asnjë përgjigje. Ky është karakteri mono-etnik bashkë me mungesën e transparencës”, deklaroi ndër të tjera Kurti. Si vërejtje të tretë, shefi i qeverisë përmendi pasaktësitë e shumta historike dhe faktike që sipas tij përmban aktgjykimi i shpallur nga kryetari i trupit gjykues, Charles Smith. “I treti natyrisht janë ato pasaktësitë faktike dhe historike që u gjykuan më 16 shtator. Le të mos harrojmë se atë ditë janë lexuar dhjetëra faqe, por vendimi i plotë është mijëra faqe. Ndoshta është lexuar një përqindje një-shifrore e vendimit të përgjithshëm dhe është çështje javësh kur do të dalë verdikti i plotë dhe unë dyshoj që ndokush edhe prej ekipeve të mbrojtjes që ka arritur ta lexojë në plotni dhe saktësi të gjithë verdiktin”, u shpreh ai. Në këtë kontekst, Kurti bëri thirrje që përballë këtij procesi në Apel, Kosova të harmonizojë dhe të unifikojë qëndrimet e saj zyrtare edhe me Republikën e Shqipërisë. “Në mbrojtjen që duhet t’ua bëjmë si shtet dhe si shoqëri, por unë do të thosha edhe si Shqipëri, sepse ju e dini se gjenocidi i Serbisë në Kosovë nuk ka ndodhur pse thjesht jemi të Kosovës, por për shkak se jemi shqiptarë. Ju e patë se në aktgjykim u përmendën 14 komuna të Kosovës, por edhe dy në Shqipëri. Prandaj duhet të jemi bashkë, jo vetëm spektri politik në Kosovë, bashkë si shoqëri padyshim por edhe bashkë me Shqipërinë”, përfundoi kryeministri Kurti.