Barcelona tentoi transferimin e kapitenit të Interit, zbulohet prapaskena e bujshme e merkatos

Klubi italian i Interit ka qenë shumë pranë humbjes së shërbimeve të kapitenit dhe sulmuesit të tij kryesor, Lautaro Martinez. Gjiganti spanjoll Barcelona kishte shfaqur interesim konkret për yllin argjentinas, duke e parë atë si pasardhësin ideal të Robert Lewandowskit, mirëpo operacioni nuk u finalizua dhe lojtari vazhdoi aventurën e tij në Milano. Këto zhvillime janë konfirmuar zyrtarisht nga numri një i klubit katalanas, Joan Laporta. Në një deklaratë për mediat italiane, presidenti i Barçës pranoi hapur se kishte bërë lëvizje konkrete për të siguruar firmën e sulmuesit. "Gjithçka është e vërtetë, doja Lautaro Martinez me çdo kusht. Është një futbollist i jashtëzakonshëm dhe nuk donim që të na shpëtonte rasti," u shpreh Laporta për *Corsport*. Më tej, kreu i klubit blaugrana tregoi se si zhvilloi bisedimet direkte me drejtuesit e zikaltërve, të cilat u mbyllën shpejt për shkak të qëndrimit të prerë të klubit italian. "Kështu që telefonova Marottan dhe më tha se futbollisti nuk është në shitje. Për më tepër, në çdo rast, nuk do të ishte lojtari që do të transferohej apo jo, sepse Interi kërkonte ta mbante me çdo kusht. Kështu që, për hir të respektit ndaj Marottas, të cilin e vlerësoj jashtëzakonisht shumë, e lamë me kaq," shtoi ai. Pas dështimit të kësaj piste, vëmendja e Barcelonës duket se është zhvendosur diku tjetër brenda kampionatit italian, kësaj radhe për pankinën, ku në shënjestër ka përfunduar trajneri i Comos, Cesc Fabregas. "Fabregas e njeh mentalitetin dhe vizionin e Barcelonës më mirë se çdokush tjetër. Këtu është rritur dhe kjo do të jetë gjithmonë shtëpia e tij, për më tepër mënyra se si e kupton ai futbollin na pëlqen shumë," deklaroi Laporta, duke mos lënë pa përmendur edhe situatën aktuale të skuadrës. Megjithatë, ai sqaroi se aktualisht klubi ka besim të plotë te stafi teknik ekzistues: "Por tani kemi një trajner të jashtëzakonshëm si Flick dhe ju e keni parë vetë se çfarë është në gjendje të bëjë ky ekip." Në fund të prononcimit të tij, presidenti i Barcelonës u ndal te projekti i diskutueshëm i Superligës Evropiane, duke dhënë opinionin e tij rreth ndryshimeve në futbollin evropian. "Ne ishim ndër themeluesit e ECA-s, e cila ka punuar jashtëzakonisht mirë për shtatë vjet. Kishim idetë tona dhe ato ide, që në fillim mbaheshin peng, kontribuuan në ndryshimin nga i cili tani po përfitojnë të gjithë. Sot klubet janë shumë më të fuqishme se më parë," përfundoi Laporta.