Tronditet futbolli bullgar: Ekzekutohet me armë zjarri presidenti i Botev Plovdiv, Iliyan Filipov

Një ngjarje e rëndë ka tronditur vendin fqinj, ku biznesmeni i njohur dhe drejtuesi i klubit të futbollit Botev Plovdiv, Iliyan Filipov, ka mbetur i vrarë gjatë orëve të para të së mërkurës në qytetin e Plovdivit. Filipov, i cili njihej gjithashtu si pronar i kompanisë së njohur të transportit dhe logjistikës PIMK dhe aksionari kryesor i skuadrës bullgare, u qëllua për vdekje rreth orës 01:00 pas mesnate brenda një prone private në qytet. Si pasojë e këtij krimi të rëndë, organet e rendit kanë ngritur nivelin e gatishmërisë, duke vendosur masa të rrepta sigurie dhe duke bllokuar përkohësisht të gjitha pikat kryesore të hyrjes dhe daljes së qytetit të Plovdivit. Prokurorja e Qarkut të Plovdivit, Vanya Hristeva, gjatë një konference për media, bëri të ditur se organet e drejtësisë janë duke shqyrtuar çdo pistë të mundshme për të hedhur dritë mbi këtë ngjarje tragjike. “Po ndjekim në mënyrë aktive të gjitha pistat e mundshme”, u shpreh Hristeva para gazetarëve. Aktualisht, operacioni hetimor është në zhvillim e sipër, ndërkohë që autoritetet kompetente ende nuk kanë publikuar informacione lidhur me motivet e krimit apo identitetin e autorëve të dyshuar.