16 vjet nga zhdukja e Bleona Matës: Dëshmia rrëqethëse e gjyshit dhe detajet e reja për makinën e dyshimtë në fshat

Ka 16 vjet që fati i vogëlushes Bleona Mata mbetet një enigmë e madhe. Gjashtëvjeçarja u zhduk pa lënë gjurmë më 22 maj 2010 në fshatin Zapod të Kukësit, në kohën kur po kullotte bagëtitë së bashku me disa vajza të tjera të familjes. Që nga ajo ditë tragjike, përpjekjet e autoriteteve dhe familjarëve nuk kanë sjellë ende një përgjigje përfundimtare mbi fatin e saj. Çështja e Bleonës është rikthyer herë pas here në vëmendjen e publikut, ndërsa dëshmi të ndryshme kanë hedhur dritë mbi pista të reja hetimore. Një prej tyre përfshin një familje nga Vlora, aludime të cilat janë hedhur poshtë nga vetë të afërmit e përmendur, pasi deri më tani mungon një provë shkencore apo zyrtare që mund të zbardhë të vërtetën. I ftuar në emisionin “Me Zemër të Hapur” të moderatores Evis Ahmeti, gjyshi i 6-vjeçares, Zenel Mata, ka sjellë në vëmendje kujtimet e dhimbshme të asaj dite. Ai tregoi se po kositiste barin pranë banesës së tij kur kishte parë për herë të fundit mbesën duke luajtur në qendër të fshatit. Sapo u dha alarmi se ajo ishte zhdukur, i gjithë fshati u ngrit në këmbë, duke nisur krehjen e zonës përreth për ditë të tëra, por pa sukses. Gjatë rrëfimit të tij, Zenel Mata ka mohuar çdo mundësi konflikti apo hasmërie me fqinjët, duke hedhur poshtë dyshimet e ngritura ndaj rrethit të tij familjar. Ai gjithashtu ka përmendur praninë e një automjeti të dyshimtë në fshat gjatë ditës së ngjarjes, ku sipas dëshmive ndodheshin dy gra me shami, ndërsa ka shprehur edhe pikëpamjet e tij personale lidhur me pistën e Vlorës. Megjithatë, këto mbeten vetëm pretendime të ngritura nga vetë ai dhe jo fakte të konfirmuara zyrtarisht. Pas një dekade e gjysmë ankthi, gjyshi pohon se besimi i tij se Bleona është gjallë nuk është shuar kurrë. Në mbyllje të intervistës, ai ka përcjellë një mesazh prekës për mbesën e tij, duke i bërë thirrje që, nëse ndodhet diku e gjallë dhe ka mundësi ta dëgjojë këtë rrëfim, t'i dërgojë familjes qoftë edhe një shenjë të vetme se është mirë.