Ministria e Pushtetit Lokal hedh poshtë vendimin e Përparim Ramës për dhënien e Tulltores në shfrytëzim 50-vjeçar

Vendimi i Komunës së Prishtinës për t'i dhënë kompleksit të Tulltores për shfrytëzim 50-vjeçar kompanisë “BGC SH.P.K.” është cilësuar si i paligjshëm nga Ministria e Administrimit të Pushtetit Lokal (MAPL). Ky zhvillim u bë i ditur nga kryeasamblisti i Lëvizjes Vetëvendosje në Kryeqytet, Gëzim Sveçla, i cili publikoi dokumentin zyrtar të dikasterit qeveritar. Sipas pjesës së vendimit të bërë publike përmes rrjeteve sociale, Departamenti Ligjor i MAPL-së ka konstatuar se akti i Kuvendit Komunal për tjetërsimin e përkohshëm të kësaj prone bie në kundërshtim të plotë me dispozitat ligjore në fuqi. Sveçla ka përsëritur se Tullorja mbetet pronë dhe nën menaxhimin e Komunës, duke i bërë thirrje kryetarit Përparim Rama që të heqë dorë nga çdo tentativë për të dëmtuar pasurinë publike të qytetarëve. Kujtojmë se miratimi i kësaj marrëveshjeje në Kuvendin Komunal ishte shoqëruar me tensione të ashpra dhe protesta simbolike me pranga nga ana e asamblistit të Vetëvendosjes. Sipas pazarit të negociuar mes qeverisjes lokale dhe investitorit privat, kompleksi prej 42,000 metrash katrorë do t'i kalonte në menaxhim kompanisë prapa së cilës qëndron Blerim Gërbeshi, një person i dënuar më parë nga Gjykata e Prishtinës për veprën penale të shpëlarjes së parave. Detajet e marrëveshjes parashikonin një investim në fazën e parë 5-vjeçare prej 10,000,000.00 €, kurse në fazat vijuese shuma do të arrinte deri në 20,000,000.00 €. Plani përfshinte shfrytëzimin e hapësirës për qëllime afariste, kulturore, administrative, gastronomike dhe ekonomike, duke ndaluar rreptësisht banimin dhe duke vendosur detyrimin për ruajtjen e trashëgimisë industriale. Sa i përket afateve, rinovimi i objekteve ekzistuese, që përfshin strukturën, fasadën, instalimet dhe efiçencën energjetike, ishte planifikuar të zgjaste 9 muaj, ndërsa ndërtimet e reja brenda 36 muajve. Nga ana tjetër, komuna do të përfitojë 15% të të hyrave bruto nga qarkullimi i përgjithshëm i projektit, me pagesa që do të kryheshin çdo tremujor, ndërsa mirëmbajtja dhe financimi i plotë për 50 vite i takonte investitorit. Megjithatë, përfshirja e Blerim Gërbeshit, i cili sipas të dhënave të Agjencisë për Regjistrimin e Bizneseve në Kosovë (ARBK) figuron si pronar, aksionar dhe drejtor i kompanisë përfituese, ka ngritur vazhdimisht dyshime dhe pikëpyetje të mëdha etike e ligjore rreth këtij partneriteti.