Thomas Tuchel paralajmëron epokën e re: Jude Bellingham mund të jetë kapiteni i ardhshëm i Anglisë

Selektori i Kombëtares së Anglisë, Thomas Tuchel, ka lënë të kuptohet se mesfushori Jude Bellingham është një kandidat ideal për të mbajtur shiritin e kapitenit të “Tre Luanëve” në baza afatgjata, pas triumfit 2-0 kundër Çekisë në Ligën e Kombeve. Futbollisti i Real Madridit u bë bartës i shiritit në minutën e 71-të të takimit, pasi zëvendësoi kapitenin kryesor, Harry Kane. Një skenar i ngjashëm kishte ndodhur edhe në çastet e fundit të sfidës ndaj Spanjës, kur Bellingham gjithashtu mori përgjegjësinë e udhëheqjes në fushë pas largimit të sulmuesit. “Nëse je kapiten në fund të këtyre ndeshjeve, atëherë sigurisht që mund të jesh kapiteni i përhershëm”, deklaroi Tuchel gjatë konferencës për shtyp. Strategu gjerman bëri të ditur se kishte zhvilluar një bisedë me 23-vjeçarin rreth statusit dhe kontributit të tij në grup, duke e vlerësuar lart përkushtimin e tij edhe jashtë vijave të fushës. “Mendoj se ai e pëlqen të jetë me ne për momentin, të paktën kështu e ndiej. Sot patëm një bisedë të shkurtër për rolin e tij. Të dy e kishim atë ndjesinë se donim të vazhdonim dhe të nisnim përsëri, por më pas të dy menduam se ndoshta 30 minuta ishin të mjaftueshme për sot”, u shpreh ai. Tuchel sqaroi se ylli anglez nuk kishte regjistruar një ngarkesë të tillë minutash gjatë këtij edicioni, ndaj stafi teknik vendosi të mos ndërmerrte rreziqe të panevojshme me shëndetin e tij. “Ai e ka bërë këtë më parë, por jo gjatë këtij sezoni, ndaj nuk donim të ishim të parët që do ta provonim. Megjithatë, edhe në këtë paraqitje të shkurtër mund ta shihni se ai është i sigurt në vete dhe i lumtur që të ndihmojë ekipin edhe nga banka”, shtoi tutje trajneri. “Pra, po, është një shpërblim t’i japësh shiritin e kapitenit. Është diçka e mirë”, përfundoi ai rreth kësaj çështjeje. Megjithatë, fitorja dhe optimizmi u shoqëruan edhe me një shqetësim nga kampi anglez. Tuchel konfirmoi se Bellingham ndjeu një problem fizik në mbyllje të ndeshjes, ndërsa mbetet shpresa që dëmtimi të mos jetë alarmant. “Ai pati një shqetësim të vogël në fund të ndeshjes. Shpresojmë që të mos jetë asgjë serioze dhe që të jetë i gatshëm për ndeshjen ndaj Kroacisë”, përfundoi deklaratën e tij Tuchel.