Gjykata Supreme i hap rrugë administratës Trump për dëbimin e menjëhershëm të emigrantëve në vende të treta

Gjykata Supreme e Shteteve të Bashkuara i ka dhënë dritën jeshile administratës Trump për të vijuar me dëbimin e emigrantëve drejt shteteve të treta, pa qenë e detyruar t'u japë atyre mundësinë për të shprehur rreziqet apo dëmet me të cilat mund të ballafaqohen. Ky zhvillim konsolidon një mekanizëm kyç që Donald Trump e ka shfrytëzuar për largime të përshpejtuara, në kuadër të politikës së tij të ashpër ndaj imigrimit. Trupa e gjyqtarëve mbështeti kërkesën e paraqitur nga Departamenti i Drejtësisë, duke bllokuar kështu vendimin e mëparshëm të Brian Murphy, gjyqtar i distriktit amerikan me qendër në Boston, i cili e kishte shpallur të paligjshme praktikën e Departamentit të Sigurisë Kombëtare për transferimin e emigrantëve në vende të treta. Krahas kësaj, Gjykata Supreme pranoi që në dhjetor të shqyrtojë argumentet juridike lidhur me këtë konflikt, për të nxjerrë më pas një vendim përfundimtar mbi fatin e kësaj politike. Tre gjyqtarët e krahut liberal shprehën qëndrim kundër këtij vendimi. Përfaqësuesit ligjorë të qeverisë federale bënë të ditur se vendimi i shkallës së parë kishte detyruar autoritetet të anulonin një fluturim dëbimi, në bordin e të cilit ndodheshin rreth 70 persona që po transportoheshin drejt tri shteteve të ndryshme. Kujtojmë se më parë, gjyqtarët kishin lejuar përkohësisht vijimin e fluturimeve të dëbimit, të cilat përbëjnë një gur themeli të qasjes së administratës Trump. Në një tjetër zhvillim favorizues për ekzekutivin, gjykata më vonë shfuqizoi kufizimet që gjyqtari kishte vendosur për të mbrojtur një grup meshkujsh nga transferimi i detyruar drejt Sudanit të Jugut. Sipas të dhënave dhe përllogaritjeve të organizatave për mbrojtjen e të drejtave të njeriut, që nga viti i kaluar, kur nisi zbatimi i kësaj politike, më shumë se 25,000 individë janë dëbuar në 29 shtete të ndryshme, ku pjesa dërrmuese e tyre janë ridrejtuar për në Meksikë. Po ashtu, administrata ka realizuar dëbime edhe drejt shteteve të treta si Sudani i Jugut – vend i përfshirë nga paqëndrueshmëria politike, për të cilin Departamenti Amerikan i Shtetit u bën thirrje qytetarëve amerikanë ta shmangin për shkak të kërcënimeve të larta nga krimi, rrëmbimet dhe konfliktet e armatosura – si dhe drejt Ugandës, Guinesë Ekuatoriale, Liberisë, Republikës Qendrore Afrikane dhe destinacioneve të tjera.