Fluturimi drejt Tel Avivit ndryshon kursin urgjentisht pas sinjalit të rrëmbimit: Izraeli kalon në gatishmëri

Një ngjarje e pazakontë ka ndodhur gjatë ditës së mërkurë, kur një avion i kompanisë "flydubai", i cili po udhëtonte nga Dubai në drejtim të Tel Avivit, u detyrua të ndryshojë trajektoren në mënyrë të menjëhershme pas aktivizimit të sinjaleve të alarmit për një ndërhyrje të mundshme të paligjshme në bord. Bëhet fjalë për fluturimin me numër FZ1073, në bordin e të cilit ndodheshin rreth 180 pasagjerë. Pasi ndryshoi kursin në mes të udhëtimit, mjeti fluturues u drejtua drejt hapësirës ajrore të Arabisë Saudite, ku më pas arriti të ulej pa probleme në aeroportin e Tabukut. Sipas të dhënave të siguruara, piloti i mjetit vuri në punë kodin e posaçëm të emergjencës 7500, shifër kjo që sinjalizon rrezikun e një rrëmbimi ose të një akti të paligjshëm në kabinë. Si pasojë e këtij alarmi, shteti izraelit ngriti menjëherë shkallën e gatishmërisë, duke ngritur në ajër avionë luftarakë për të ndjekur nga afër ecurinë e situatës. Kjo ngjarje krijoi menjëherë një valë shqetësimi në Izrael, sidomos për shkak të itinerarit të fluturimit që lidhte Emiratet e Bashkuara Arabe me metropolin izraelit. Në dritën e këtyre zhvillimeve, kryeministri izraelit Benjamin Netanyahu thirri takime urgjente me kabinetin e sigurisë, ndërkohë që strukturat kompetente nisën verifikimet për të zbardhur rrethanat e ngjarjes. Pavarësisht frikës fillestare, pas uljes së suksesshme të avionit në territorin saudit, zyrtarët izraelitë deklaruan se incidenti nuk mendohet të ketë qenë një tentativë e vërtetë rrëmbimi. Shkaku i saktë se pse u aktivizua sinjali i rrezikut vazhdon të mbetet ende nën lupën e hetimeve. Ndërkohë, burime mediatike nga Izraeli kanë hedhur dritë edhe mbi një pistë tjetër alternative rreth asaj që mund të ketë ndodhur brenda kabinës. Sipas këtyre pretendimeve, sinjali i emergjencës mund të jetë dhënë si pasojë e një mosmarrëveshjeje apo konflikti fizik mes dy pilotëve. Gjithsesi, ky version nuk ka marrë ende ndonjë konfirmim zyrtar nga ana e kompanisë "flydubai" apo autoriteteve të aviacionit, duke mbetur kështu thjesht pjesë e dosjes hetimore. Pasagjerët nuk kanë pësuar asnjë lloj lëndimi gjatë këtij incidenti, ndërsa avioni u ul shëndoshë e mirë. Autoritetet përkatëse pritet të vijojnë marrjen në pyetje të stafit fluturues dhe verifikimet e detajuara teknike për të hedhur dritë përfundimtare mbi motivet e këtij rasti.