LSDM lëshon akuza të forta ndaj kryeministrit: Nën udhëheqjen e Mickoskit u shndërruam nga liderë rajonalë në humbës të integrimit evropian

Lidhja Socialdemokrate e Maqedonisë (LSDM) ka hedhur akuza të ashpra në drejtim të kryeministrit Hristijan Mickoski, duke e bërë atë përgjegjës direkt për ngecjen e vendit në rrugën drejt Bashkimit Evropian. Sipas partisë opozitare, Komisioni Evropian ka nisur përgatitjen e udhërrëfyesve për katër shtete, përkatësisht Malin e Zi, Shqipërinë, Moldavinë dhe Ukrainën, ndërsa Maqedonia e Veriut është lënë sërish jashtë këtij procesi. "Ne mbetemi të bllokuar. Vetëm në dy vjet e gjysmë me Mickoskin, kemi kaluar nga të qenit liderë në rrugën evropiane në të qenit humbës", thuhet në reagimin e LSDM-së, ku theksohet se ky dështim është pasojë e drejtpërdrejtë e politikave të shefit të qeverisë. Opozita vlerëson se në vend të reformave të mirëfillta, qeverisja aktuale po ndjek një rrugë izolimi, të shoqëruar me gënjeshtra dhe premtime të pambajtura. Sipas tyre, qytetarët po paguajnë një çmim të lartë, ndërkohë që vendi po humbet kohë, burime financiare dhe breza të tërë të rinjsh që po largohen për shkak të mungesës së perspektivës. LSDM thekson se Brukseli kërkon detyrime të përmbushura konkrete, gjyqësor të pavarur dhe luftë të pakompromis kundër korrupsionit, duke shtuar se fotografitë në korridore dhe fjalimet partiake nuk mund të zëvendësojnë reformat reale, ndërsa fushatat e zeza ndaj opozitës nuk e çojnë shtetin përpara. Në deklaratën e partisë opozitare aludohet gjithashtu se bllokimi i vendit jashtë BE-së u shërben forcave që synojnë një rajon të dobët dhe të përçarë, të ndjeshëm ndaj ndikimit të Moskës. Sipas LSDM-së, një Maqedoni jashtë Unionit i konvenon interesave ruse dhe strukturave të krimit, duke e cilësuar udhëheqësin e VMRO-DPMNE-së, Hristijan Mickoski, si një aktor të ndikuar nga këto agjenda. Në përmbyllje, LSDM bën thirrje se vendi nuk duhet të mbetet peng i askujt dhe se Maqedonia e Veriut është atdheu i qytetarëve që meritojnë një të ardhme të sigurt evropiane. Opozita këmbëngul se çdo individ apo strukturë që pengon reformat dhe mban shtetin të izoluar, duhet të mbajë përgjegjësi para ligjit dhe qytetarëve.