Gruda akuzon Vetëvendosjen për qasje të padrejtë ndaj nismës së PDK-së për Specialen dhe kushtëzim me postin e presidentit

Deputeti i Partisë Demokratike të Kosovës, Përparim Gruda, ka kritikuar ashpër Lëvizjen Vetëvendosje, duke e cilësuar si të papranueshme dhe jo të ndershme mënyrën se ajo po i qaset kërkesës për ndryshime në Ligjin për Dhomat e Specializuara të Kosovës. Sipas tij, pas vendimit të fundit të Gjykatës Speciale në Hagë ndaj katër ish-krerëve të Ushtrisë Çlirimtare të Kosovës, në radhët e PDK-së ekzistonin pritshmërie për një reflektim të mirëfilltë politik. Gruda theksoi se fokusi i partive politike duhet të kishte qenë te krijimi i një debati më të gjerë, duke lënë mënjanë agjendat dhe interesat ngushtësisht partiake. Ai u shpreh i habitur me mungesën e përgjegjësisë shtetërore nga ana e pushtetit aktual. “Lëvizjes Vetëvendosje po i mungon vetëdija edhe përgjegjësia shtetërore. Unë jam i befasuar me sjelljen e tyre pas vendimit të Hagës. Kemi pritur që pas atij vendimi të ketë një diskutim ku lihen anash interesat partiake. Nuk mundesh sot që PDK-ja ta sjellë një ligj për ta mbrojtur UÇK-në, e ti me i thënë: ‘A i ke votat për president?’ Është e pandershme. Pra, u kushtëzuam. Është e pandershme vetëm me e fut në atë debat. Do të thotë, në një fatkeqësi kaq të madhe kombëtare, ti e fut në debat duke thënë: ‘Po dua edhe pak pushtet’. Unë, si PDK, të them që po dua pak dinjitet me e mbrojt UÇK-në, e ti më thua: ‘Po dua edhe pak pushtet’. Ti e ki parlamentin, e ki qeverinë dhe po don akoma pushtet. E kur? Në një moment kaq të ligë për këtë vend, është e pandershme. Së pari, me e hap si debat është shumë e pandershme. Po, është çështja e presidentit, por ti duhet njëherë të përgjigjesh në këtë çështjen e Speciales”, ka deklaruar ai. Ligjvënësi i opozitës vuri në dukje gjithashtu se nuk e ka pritur aspak reduktimin e kësaj teme kaq të ndjeshme në përleshje për pushtet apo në hedhje fajesh rreth rrethanave të themelimit të këtij institucioni. “Kjo mungesë e vetëdijes, për mua, është shumë e çuditshme. Kur ka dalë vendimi, unë kam pritur njëfarë reflektimi tjetër, por që reduktohet gjithçka tek pushteti e tek akuzat se kush dhe pse e ka themeluar Gjykatën Speciale, unë nuk e kam pritur. Dhe kjo është situata në të cilën jemi”, ka theksuar Gruda. Në mbyllje të prononcimit të tij, Gruda bëri të ditur se PDK-ja do të angazhohet maksimalisht deri më 6 tetor për të ndërtuar një unitet politik, i cili do t'i hapte rrugë ndryshimeve të nevojshme ligjore për Dhomat e Specializuara, por edhe çështjes së zgjedhjes së presidentit. Ai bëri me dije se partia e tij do të shmangë përplasjet dhe akuzat publike, me qëllim që t'i jepet hapësirë arritjes së një konsensusi kombëtar, pasi vendi ynë nuk ka nevojë për një cikël të ri zgjedhor. “Ne sigurisht që do të kursehemi nga çfarëdo lloj cilësimesh tash për me provu deri më datën 6 për me mbrri një unitet në lidhje me Ligjin për Specialen dhe në lidhje me zgjedhjen e presidentit, sepse Kosova definitivisht nuk ka nevojë për zgjedhje të reja”, ka përfunduar Gruda.