Gruda: Sjellja e Vetëvendosjes ndaj nismës për Specialen është e papranueshme dhe e kushtëzuar me pushtet

Deputeti i Partisë Demokratike të Kosovës, Përparim Gruda, ka hedhur kritika të ashpra ndaj qasjes së Lëvizjes Vetëvendosje lidhur me nismën për ndryshimet në Ligjin për Dhomat e Specializuara të Kosovës, duke e cilësuar atë si thellësisht të pandershme. Sipas Grudës, pas vendimit të fundit të Gjykatës Speciale në Hagë ndaj katër ish-krerëve të Ushtrisë Çlirimtare të Kosovës, në radhët e PDK-së ekzistonte pritshmëria për një reflektim të mirëfilltë politik dhe një bashkim rreth interesave shtetërore, duke lënë mënjanë kalkulimet partiake. Ai ka vënë inatin politik në pah, duke theksuar se është e papranueshme që në një moment kaq delikat kombëtar, kur kërkohet mbrojtja e vlerave të UÇK-së, pushteti të vendosë kushte. “Nuk mundesh sot që PDK-ja ta sjellë një ligj për ta mbrojtur UÇK-në, e ti me i thënë: ‘A i ke votat për president?’ Është e pandershme. Në një fatkeqësi kaq të madhe kombëtare, ti e fut në debat duke thënë: ‘Po dua edhe pak pushtet’”, ka deklaruar ndër të tjera deputeti i PDK-së. Në vijim të fjalës së tij, Gruda u shpreh i habitur se si një ngjarje e tillë e rëndë u katandis në përplasje për poste dhe në akuza të shkuara rreth themelimit të këtij institucioni, në vend që të nxiste një qasje unifikuese nga ana e institucioneve. Në fund të prononcimit, Gruda bëri të ditur se Partia Demokratike e Kosovës do të tregohet e matur dhe do të shmangë përplasjet politike deri më 6 tetor, me synimin për të ndërtuar një konsensus të gjerë kombëtar, si për çështjen e ndryshimeve ligjore të Dhomave të Specializuara, ashtu edhe për procesin e zgjedhjes së presidentit, pasi vendi ynë nuk ka luksin e zgjedhjeve të reja.