Krisje mes Ronaldos dhe trajnerit Jesus? Ylli portugez shmang stërvitjen me grupin pas injorimit në stol

Fitorja bindëse ndaj Norvegjisë dëshmoi se Portugalia, nën udhëheqjen e teknikut Jorge Jesus, ka potencialin e duhur për të synuar trofe të rëndësishëm. Megjithatë, ky triumf ka kaluar në plan të dytë, pasi është riaktivizuar sërish ajo që po cilësohet si "çështja Ronaldo". Sulmuesi legjendar e ndoqi të gjithë sfidën e fundit nga stoli, pa mundur të zbresë në fushë për asnjë minutë. Teksa përfaqësuesja luzitane nisi menjëherë përgatitjet për përballjen e radhës ndaj Danimarkës, ra në sy mungesa e pesë herë fituesit të Topit të Artë në seancën e rregullt stërvitore. Sipas raportimeve të prestigjiozes portugeze "A Bola", në vend të stërvitjes me grupin, Ronaldo është parë duke shijuar një kafe. Të njëjtin veprim ka bërë edhe Joao Felix, i cili kohët e fundit është pozicionuar si lideri i ri i fazës ofensive të luzitanëve. Më vonë, ndërsa pjesa tjetër e skuadrës vijonte punën në fushë, Ronaldo u rikthye në hotel për të kryer ushtrime në palestër. Ky zhvillim vjen menjëherë pas ndeshjes me Norvegjinë, e cila shënoi herën e parë që nga viti 2008 që Ronaldo lihet në stol për 90 minuta të plota pa u aktivizuar. Ky vendim ka nxitur spekulime të shumta në Portugali, ku ky gjest interpretohet si një sinjal i qartë i krisjes së marrëdhënieve mes yllit të futbollit dhe trajnerit Jesus, çka pritet të sjellë tensione të reja në vazhdim.