Gacaferi 'shënjestron' PDK-në: Pro-amerikanizmi i tyre zgjat deri kur preken interesat personale

Anëtari i partisë Guxo, Luan Gacaferi, ka adresuar kritika të ashpra në drejtim të Partisë Demokratike të Kosovës, pas qëndrimeve të shprehura nga përfaqësues të kësaj partie në një debat televiziv. Në fokus të kritikave të tij ishin pretendimet e PDK-së për largimin e misioneve ndërkombëtare si EULEX dhe KFOR nga territori i Kosovës. Sipas Gacaferit, qëndrimi pro-amerikan i opozitës, e në veçanti i PDK-së, është i kushtëzuar. Ai pretendon se këto struktura politike shfaqen si aleate të Shteteve të Bashkuara të Amerikës vetëm për sa kohë nuk cenohen përfitimet e tyre të ngushta financiare apo interesat personale. “Ata janë pro-amerikanë për aq kohë sa Amerika i lë të qetë dhe nuk i prek në xhepin e tyre”, ka deklaruar ai. Gacaferi rikujtoi një parashikim të bërë nga ana e tij një vit më parë, ku kishte paralajmëruar se, në momentin që SHBA-ja do të ndërmerrte veprime që prekin interesat e këtyre grupeve, ata do të shfaqnin fytyrën e tyre të vërtetë, duke u shndërruar në kundërshtarë të hapur të politikës amerikane. Ai e ilustroi këtë me deklaratat e fundit nga radhët e PDK-së, të cilët kërkuan largimin e forcave të KFOR-it dhe misionit të EULEX-it, me pretendimin se Kosova i ka kapacitetet e veta mbrojtëse. Në një gjuhë mjaft të ashpër, anëtari i Guxo-s nuk ngurroi t’i rikthehej së kaluarës ideologjike të këtyre subjekteve. Ai hodhi akuza duke thënë se këta politikanë e kanë origjinën nga ideologjia marksiste-enveriste. “Dikur ishin enverista, sot janë xhepista”, përfundoi Gacaferi, duke theksuar se shfaqja e këtyre qëndrimeve në debat televiziv vetëm sa konfirmon dyshimet e tij të hershme mbi sinqeritetin e partneritetit të tyre me ndërkombëtarët.