Laporta pranon tentativën për transferimin e Lautaro Martinezit: E doja me çdo kusht në Barcelonë

Presidenti i Barcelonës, Joan Laporta, ka hedhur dritë mbi prapaskenat e merkatos së verës, duke konfirmuar se klubi katalanas kishte shfaqur interesim serioz për të siguruar shërbimet e sulmuesit të Interit, Lautaro Martínez. Në një intervistë të dhënë për prestigjiozen italiane “Corriere dello Sport”, numri një i Barcelonës pranoi hapur se argjentinasi ishte objektivi kryesor i ekipit të tij. “Është e vërtetë, kisha një dëshirë të madhe për ta pasur Lautaron në radhët tona me çdo kusht”, ka pohuar Laporta. Për të konkretizuar interesimin, Laporta zbuloi se kishte ndërmarrë një iniciativë direkte duke kontaktuar homologun e tij te zikaltrit, Giuseppe Marotta. Megjithatë, përgjigjja nga Milano ishte kategorike: futbollisti nuk ishte në shitje. “Bëhet fjalë për një lojtar të nivelit të lartë dhe ne nuk donim ta humbisnim mundësinë për ta afruar. Pasi telefonova Marottën, ai më bëri të qartë se nuk kishte hapësirë për negociata”, rrëfeu më tej presidenti i Barcelonës. Sipas Laportës, drejtuesi i Interit theksoi se vendimi për të qëndruar në Milano ishte institucional dhe nuk varej nga dëshirat e lojtarit, pasi klubi e konsideronte kapitenin si të pashitshëm. “Marotta më sqaroi se, pavarësisht gjithçkaje, nuk do të ishte lojtari ai që do të vendoste për transferimin, sepse Interi kishte qëllim të palëkundur ta mbante atë. Nga respekti i madh që kam për Beppen, vendosa të tërhiqem”, përfundoi Laporta. Kështu, përpjekjet e Barcelonës mbetën vetëm në kuadrin e dëshirës, pasi Interi nuk pranoi të ulej në tryezën e bisedimeve për largimin e yllit të tyre, duke konfirmuar kështu vazhdimësinë e argjentinasit në kryeqytetin lombard.