Tragjedi në Pezë: 16-vjeçari humb jetën pasi mori makinën e të atit pa leje

Një ngjarje e rëndë ka tronditur mbrëmjen e djeshme zonën e Pezës në Tiranë, ku një aksident rrugor me pasoja fatale i ka marrë jetën një adoleshenti. Viktima, një 16-vjeçar, ka gjetur vdekjen e menjëhershme pasi automjeti që drejtonte doli nga rruga dhe përfundoi në një kanal. Në automjet bashkë me të miturin ndodhej edhe një 15-vjeçar, i cili fatmirësisht ka shpëtuar nga përplasja. Ai është dërguar menjëherë drejt spitalit për të marrë trajtimin e nevojshëm mjekësor dhe, sipas informacioneve të fundit, ndodhet jashtë rrezikut për jetën. Nga hetimet paraprake të autoriteteve policore, dyshohet se ngjarja ka ndodhur për shkak të humbjes së kontrollit mbi mjetin. Gjithashtu, është zbardhur se i mituri e kishte marrë makinën në mënyrë të fshehtë nga familja, pa dijeninë dhe lejen e të atit. Grupi hetimor ndodhet në vendngjarje dhe po punon intensivisht për dokumentimin e plotë të rrethanave në të cilat ndodhi ky aksident tragjik.