Qendra “Gjenocidi në Kosovë” kërkon reagim urgjent institucional: Të zhbëhen Dhomat e Specializuara

Qendra “Gjenocidi në Kosovë – Plagë e Hapur” u është drejtuar me një shkresë zyrtare krerëve më të lartë të shtetit, duke ngritur alarmin për atë që e konsideron si kërcënim ndaj pavarësisë së vendit. Në këtë letër, kërkohet shpallja e gjendjes së jashtëzakonshme dhe shfuqizimi i menjëhershëm i Dhomave të Specializuara dhe Zyrës së Prokurorit të Specializuar. Dokumenti i është dërguar kryetares së Kuvendit, ushtrueses së detyrës së Presidentit, kryeministrit Albin Kurti, si dhe përfaqësuesve të partive politike. Sipas organizatës, vendimi i 16 shtatorit i marrë nga gjykata speciale përbën një shkelje flagrante të parimeve kushtetuese të Kosovës, duke shtrembëruar, siç pretendojnë ata, të vërtetën historike mbi luftën çlirimtare. Në këtë drejtim, Qendra i është referuar deklaratës së 28 shtatorit, të mbështetur nga 99 deputetë të Kuvendit të Kosovës, e cila bën thirrje për mbrojtjen e pastërtisë së luftës dhe ndërtimin e një strategjie të përbashkët shtetërore. Ata kërkojnë që ky konsensus politik të konkretizohet përmes veprimeve vendimtare. Një tjetër pikë e ndjeshme e ngritur në letër lidhet me përbërjen e Panelit të Apelit për rastin e Hashim Thaçit, Jakup Krasniqit, Kadri Veselit dhe Rexhep Selimit. Qendra shpreh rezerva të forta mbi këta gjyqtarë, duke theksuar faktin se ata kanë qenë pjesë e proceseve të mëparshme ndaj Hysni Gucatit, Nasim Haradinajt, Salih Mustafës dhe Pjetër Shalës. Për organizatën, ky fakt e bën rezultatin e procesit aktual të parashikueshëm, duke e përshkruar situatën si një rast të “DÉJÀ VU”. Si përfundim, Qendra “Gjenocidi në Kosovë – Plagë e Hapur” e vlerëson si domosdoshmëri urgjente abrogimin e nenit 162 të Kushtetutës. Sipas tyre, vetëm përmes zhbërjes së këtij institucioni të drejtësisë, Kosova mund të shmangë rreziqet që i kanosen, duke u bërë thirrje forcave politike që të ruajnë unitetin dhe të veprojnë në mbrojtje të interesave shtetërore.