Kriza e besimit në Gjermani: Qytetarët gjithnjë e më skeptikë ndaj institucioneve shtetërore

Gjermania po përballet me një rënie historike të besimit të qytetarëve ndaj aparatit shtetëror. Sipas të dhënave të një sondazhi të fundit, vetëm 32 për qind e të anketuarve kanë shprehur besim të lartë ose shumë të lartë ndaj shtetit në përgjithësi, një shifër kjo në ulje krahasuar me 38 për qind që regjistrohej katër vjet më parë. Studimi i titulluar "eGovernment Monitor 2026", i realizuar nga nisma D21 në bashkëpunim me Universitetin Teknik të Mynihut, evidenton gjithashtu një tkurrje të besimit ndaj administratës publike. Aktualisht, vetëm 34 për qind e qytetarëve deklarojnë se u besojnë zyrave shtetërore, duke shënuar një rënie nga 37 për qind që ishte më herët. Në këtë panoramë të përgjithshme, policia mbetet institucioni që gëzon mbështetjen më të madhe nga publiku, me 55 për qind të besimit, e ndjekur nga sistemi i drejtësisë dhe gjykatat me 41 për qind. Për sa i përket besimit te politika, qytetarët gjermanë shfaqin një preferencë më të lartë për nivelin lokal, ku 29 për qind u besojnë bashkive dhe komunave, ndërsa besimi te nivelet rajonale dhe federale bie në përkatësisht 20 dhe 17 për qind. Sondazhi pasqyron gjithashtu një skepticizëm të shtuar ndaj mediave, ku vetëm 20 për qind e të anketuarve kanë shprehur besim të lartë ndaj shtypit. Këto gjetje vijnë pas një hulumtimi të kryer nga instituti Kantar gjatë muajve prill dhe maj, ku u intervistuan rreth 8.000 persona mbi moshën 16 vjeç, duke përfshirë një përfaqësi prej 500 personash për çdo land federal. Organizatorët theksojnë se rezultatet janë përfaqësuese për përdoruesit e internetit në Gjermani, ndërsa fokus kryesor i këtij studimi ka qenë digjitalizimi i administratës publike. Nisma D21, e cila qëndron pas këtij hulumtimi, funksionon si një rrjet jofitimprurës që synon avancimin dhe zhvillimin e shoqërisë digjitale në vend.