Kronikë
Skandali në burgun e Rrogozhinës: I dënuari për vjedhje nuk kthehet nga leja, nisin hetimet për drejtuesit
Reklamë e Sponsorizuar
Një ngjarje e pazakontë ka ndodhur në IEVP Rrogozhinë, ku Alfred (Aurel) Hoxha, i dënuar me 4 vite burg për akuzën e “vjedhjes”, nuk është paraqitur për të vijuar vuajtjen e dënimit pas përfundimit të një lejeje 5-ditore.
Hoxha, me origjinë nga Shijaku, duhej të ishte rikthyer në qeli mesditën e sotme, sipas afatit të përcaktuar nga administrata e burgut. Megjithatë, ai nuk është shfaqur në institucion, duke u shpallur kështu në kërkim. Autoritetet e burgut kanë kontaktuar familjarët e tij, të cilët kanë deklaruar se nuk kanë dijeni për vendndodhjen e tij, ndërsa kanë premtuar bashkëpunim për bindjen e tij që të rikthehet për të shlyer pjesën e mbetur të dënimit, që llogaritet në 1 vit.
Sipas informacioneve, i dënuari vuante dënimin në të njëjtin institucion me vëllanë e tij, gjithashtu i dënuar për vepër të ngjashme penale. Në dëshminë e tij, vëllai ka treguar se në momentin e largimit me leje, Alfredi e kishte përqafuar duke shprehur një mall të veçantë, një detaj që tashmë po analizohet nga grupi hetimor.
Në lidhje me këtë arratisje, autoritetet kanë nisur një hetim administrativ ndaj drejtorit të burgut, Alban Zela, dhe shefit të policisë së këtij institucioni, Jonuz Brahushi, të cilët kishin miratuar lejen për të dënuarin. Dyshimet janë përforcuar për shkak të numrit të lartë të lejeve të dhëna së fundmi.
Burime konfidenciale bëjnë me dije se në burgun e Rrogozhinës janë miratuar 14 leje brenda një jave, duke tejkaluar ndjeshëm kufirin e zakonshëm prej 5 lejesh. Kjo shifër është vënë në pikëpyetje, pasi tejkalon edhe kapacitetet e burgjeve me numër më të madh të të burgosurve, si ai i Fierit, Reçit apo Drenovës, duke hedhur dyshime të forta për një prapavijë korruptive në procedurat e dhënies së këtyre lejeve.
Reklamë e Sponsorizuar
Ky artikull është përgatitur dhe verifikuar nga redaksia e Lajmet e Reja. Të gjitha të drejtat janë të rezervuara.
Reklamë e Sponsorizuar
Shpërndaj këtë lajm: