Politikë
Hykmete Bajrami: Studentët detyrohen ta vazhdojnë testin me dritën e telefonave pas ndërprerjes së rrymës
Reklamë e Sponsorizuar
Publikuar më:
Deputetja e Lidhjes Demokratike të Kosovës (LDK), Hykmete Bajrami, ka kritikuar Qeverinë Kurti për gjendjen në sektorin e energjisë, pasi një ndërprerje e rrymës elektrike ia ndërpreu testin që po mbante me studentët e nivelit master në Fakultetin Ekonomik.
Bajrami ka treguar se ngjarja ndodhi rreth orës 17:10, më 18 nëntor 2026. Ajo ka thënë se, pasi studentëve ua kishte marrë paraprakisht telefonat, ata gjetën një zgjidhje kreative për ta vazhduar testin në errësirë.
Studentët propozuan që telefonat të shpërndaheshin në mënyrë të rastësishme, në mënyrë që secili të përdorte telefonin e dikujt tjetër vetëm për ndriçim, pa e zhbllokuar atë.
Deputetja e LDK-së e ka ironizuar situatën duke thënë se fotografia nuk është bërë në periudhën e pasluftës, por në Kosovën e 18 nëntorit 2026, të cilën ajo e ka cilësuar me ironi si “Kosova e progresit të paparë”.
Përtej ironisë, Bajrami ka kërkuar nga Qeveria që urgjentisht të paraqitet në Kuvend me një plan konkret për ndërtimin e kapaciteteve të reja gjeneruese të energjisë.
Sipas saj, prodhimi vendor është zgjidhja për të shmangur krizën energjetike, ndërsa ka paralajmëruar se, nëse nuk ndërmerren hapa konkretë pas gati gjashtë vjetësh, qytetarët do të përballen me fatura gjithnjë e më të papërballueshme dhe reduktime të vazhdueshme të energjisë elektrike.
Reklamë e Sponsorizuar
Ky artikull është përgatitur dhe verifikuar nga redaksia e Lajmet e Reja. Të gjitha të drejtat janë të rezervuara.
Reklamë e Sponsorizuar
Shpërndaj këtë lajm: