Sport
Debati për Pedrin: A e meriton ylli i Barcelonës vendin e titullarit te Spanja?
Reklamë e Sponsorizuar
Statusi i Pedrit në formacionin bazë të përfaqësueses së Spanjës është shndërruar në një temë të nxehtë debati. Mesfushori i Barcelonës, i cili në ndeshjet e fundit të Ligës së Kombeve kundër Çekisë dhe Anglisë u detyrua ta niste takimin nga stoli, po mbështetet fuqishëm nga ish-lojtari i Real Madridit, Alvaro Benito.
Në një prononcim për mediat spanjolle, 49-vjeçari nuk i ka kursyer elozhet për talentin e katalanasve, duke theksuar se ai mbetet një futbollist unik. Që nga përfundimi i Kupës së Botës, përzgjedhësi Luis de la Fuente ka preferuar të ndërtojë mesfushën rreth Fabian Ruizit të PSG-së, duke e shoqëruar atë me lojtarë më defensivë si Rodri apo Martin Zubimendi. Kjo zgjedhje taktike ka hasur në kritika të shumta, veçanërisht duke parë formën e lartë që Pedri po shfaq në nivel klubesh.
Benito pranoi se ndryshimet e bëra nga stafi teknik i Spanjës pas Kupës së Botës rezultuan të suksesshme, por insistoi se kjo nuk e zbeh aspak vlerën e Pedrit. “E them me bindje se nuk ekziston tjetër lojtar me cilësitë e tij, aftësinë për të gjetur hapësira dhe për t’i bërë ballë presionit. Për mua, ai është lojtar për formacionin titullar pa asnjë dyshim”, u shpreh ish-mesfushori.
Sipas Benitos, Pedri qëndron në të njëjtin nivel me emrat më të mëdhenj të futbollit botëror, përfshirë yllin e Real Madridit, Jude Bellingham. Ai beson se mesfushori i Barcelonës është një aset i jashtëzakonshëm për çdo skuadër që kërkon cilësi në qendër të fushës.
Megjithatë, sfidën kryesore për 21-vjeçarin, Benito e sheh te rimëkëmbja psikologjike. “Problemi i vetëm i Pedrit është rikthimi në nivelin e tij më të lartë dhe rifitimi i atij vetëbesimi që mund të ketë lëkundur paksa shkaku i mungesës së minutave në kombëtare”, përfundoi ai.
Reklamë e Sponsorizuar
Ky artikull është përgatitur dhe verifikuar nga redaksia e Lajmet e Reja. Të gjitha të drejtat janë të rezervuara.
Reklamë e Sponsorizuar
Shpërndaj këtë lajm: