Politikë
Revolucion në administratë: Pagat dhe të dhënat e zyrtarëve lidhen në një sistem unik për të eleminuar burokracinë
Reklamë e Sponsorizuar
Ministria e Digjitalizimit dhe Administratës Publike ka prezantuar sot ndërlidhjen e Sistemit Informativ për Menaxhimin e Burimeve Njerëzore (SIMBNJ) me Sistemin për Menaxhimin e Pagave (SMP) dhe Thesarin, gjatë një punëtorie të organizuar në kryeqytet, Prishtinë.
Ky hap i rëndësishëm teknologjik synon harmonizimin e të dhënave, zvogëlimin e procedurave burokratike administrative, shmangien e regjistrimeve të dyfishta, si dhe ngritjen e cilësisë në menaxhimin e burimeve njerëzore dhe financave publike.
Kryesuesi i Grupit Punues për Ndërlidhjen, Dition Kuklecaj, vuri në dukje se ky projekt do të shërbejë gjithashtu si një mundësi e shkëlqyer për trajtimin e sfidave rregullatore dhe lehtësimin e qasjes në informacione.
“Ky do të shërbejë edhe si një mundësi për shërbimin e nevojave, adresimin e çështjeve rregullatore, zëvendësimin e afateve dhe qasjen të dhënave”, u shpreh Kuklecaj.
Në fjalën e tij, ministri i Digjitalizimit dhe Administratës Publike, Lulëzon Jagxhiu, theksoi se SIMBNJ nuk duhet të shihet thjesht si një regjistër elektronik për të dhënat e stafit, por si një instrument kyç për udhëheqjen strategjike të administratës publike.
“SIMBNJ duhet të jetë shumë më tepër sesa një platformë për regjistrimin e të dhënave të punonjësve. Ai duhet të shërbejë si instrument kryesor për menaxhimin strategjik të burimeve njerëzore në administratën publike. Përmes tij duhet të kemi një pasqyrë të saktë të personelit, pozitave të punës, strukturave organizative dhe nevojave për rekrutime e zhvillim profesional. Këto të dhëna janë thelbësore për planifikimin e personelit, menaxhimin e përgjithshëm të burimeve publike dhe hartimin e politikave të bazuara në evidencë. Prandaj, mirëmbajtja e të dhënave në SIMBNJ nuk është vetëm përgjegjësi e ekipeve teknike. Është përgjegjësi e përditshme e secilit institucion dhe në veçanti e njësive të burimeve njerëzore”, tha ndër të tjera Jagxhiu.
Nga ana e tij, sekretari i Përgjithshëm i Ministrisë së Financave, Arton Ahmeti, e vlerësoi këtë integrim si jetik për ruajtjen e fondeve publike dhe ngritjen e bashkëpunimit mes institucioneve shtetërore.
“Për Ministrinë e Financave, ky proces ka rëndësi të veçantë edhe për faktin se menaxhimi i përgjegjshëm i mjeteve publike kërkon mekanizma të besueshëm të kontrollit dhe administrimit. Në këtë drejtim, Thesari i Kosovës, si agjenci në kuadër të Ministrisë së Financave, ka rolin thelbësor në ekzekutimin e buxhetit dhe menaxhimin e proceseve financiare. Megjithatë, rëndësia e kësaj ndërlidhjeje shkon përtej aspektit teknologjik. Ajo është një mundësi për të forcuar bashkëpunimin ndërinstitucional, për të qartësuar përgjegjësitë dhe për të përmirësuar mënyrën se si institucionet i shkëmbejnë të dhënat për të arritur qëllimin e përbashkët në menaxhimin më të mirë të financave publike. Prandaj, përveç investimeve në teknologji, është po aq e rëndësishme edhe zhvillimi i kapaciteteve njerëzore”, deklaroi Ahmeti.
Gjatë prezantimit zyrtar, Muhamet Behrami shtjelloi se lidhja ndërmjet dy sistemeve do të lejojë përcjelljen në rrugë elektronike të çdo lëvizjeje, përfshirë emërimet, transferimet dhe shkëputjen e marrëdhënies së punës, duke parandaluar përfundimisht dyfishimet në regjistra.
Reklamë e Sponsorizuar
Ky artikull është përgatitur dhe verifikuar nga redaksia e Lajmet e Reja. Të gjitha të drejtat janë të rezervuara.
Reklamë e Sponsorizuar
Shpërndaj këtë lajm: