Incident me armë zjarri në Fushë-Kosovë: Një i plagosur përfundon në QKUK, autori identifikohet dhe shpallet në kërkim

Një ngjarje e rëndë ka tronditur pasditen e sotme fshatin Miradi të Fushë-Kosovës, ku një qytetar ka rënë viktimë e një sulmi me armë zjarri, duke pësuar plagë trupore. Sipas autoriteteve kompetente, incidenti është regjistruar rreth orës 15:50. Alarmi për forcat e rendit është dhënë nga Qendra Klinike Universitare e Kosovës (QKUK), pasi i lënduari është paraqitur atje për të marrë ndihmën e nevojshme mjekësore. Flora Ahmeti, zëdhënëse e Policisë së Kosovës për rajonin e Prishtinës, ka konfirmuar rastin për portalin tonë, duke bërë të ditur se strukturat policore kanë zbarkuar menjëherë në terren pas marrjes së njoftimit. “Menjëherë janë angazhuar njësitet policore, të cilat kanë nisë veprimet e nevojshme hetimore për sqarimin e plotë të rrethanave të rastit”, ka deklaruar Ahmeti. E pyetur mbi ecurinë e hetimeve, ajo ka shtuar se personi i dyshuar është identifikuar tashmë nga organet e rendit, mirëpo aktualisht gjendet në arrati, teksa po punohet intensivisht për kapjen e tij. “Veprimet e mëtejshme po vazhdojnë në koordinim me Prokurorin e Shtetit”, ka përfunduar Ahmeti, ndërkohë që policia vijon hetimet e pandërprera për të zbardhur plotësisht motivet dhe rrethanat që çuan deri te ky incident.