Nga “Messi kroat” te lojtari pa skuadër: Historia e dhimbshme e talentit që dështoi të shkëlqente te Barcelona

Në moshën 16-vjeçare, ai konsiderohej si “Messi kroat”, një epitet ky që ndezi menjëherë garën mes skuadrave më prestigjoze evropiane për sigurimin e shërbimeve të tij. Klubi i Barcelonës arriti të mposhtë konkurrencën e fortë të gjigantëve të tjerë, duke e transferuar atë për një shifër miliona eurosh nga rradhët e Dinamo Zagrebit. Bëhet fjalë për Alen Haliloviq, mbi të cilin kishte pritshmëri astronomike, megjithatë trajektorja e karrierës së tij mori një kthesë plotësisht të papritur. Haliloviq regjistroi vetëm 28 minuta lojë me fanellën e katalanasve, të shpërndara në një duel të vetëm të Kupës së Mbretit kundër Elches, duke mbetur kjo paraqitja e tij e vetme zyrtare me ekipin e parë. Gjatë vitit 2016, ai nisi një lëvizje nomade nëpër kontinentin e vjetër, duke u transferuar fillimisht te Hamburgu, e më pas duke kaluar te Sporting Gijoni, Las Palmasi, Milani, Standard Liege, Heerenveen, Birmingham City, Reading, Rijeka dhe së fundmi te Fortuna Sittard. Një numër i madh fanellash dhe ndryshime të shpeshta për një futbollist që dikur shihej si protagonist absolut i fushës. Megjithatë, skenari ka qenë i njëjti në çdo stacion të karrierës së tij: ndonjë paraqitje premtuese e ndjekur menjëherë nga mungesa e theksuar e vazhdimësisë. Aktualisht, Haliloviq është 30 vjeç dhe po përballet me statusin e lojtarit pa ekip. Rrugëtimi i tij sportiv nuk e preku kurrë potencialin e vërtetë që premtonte, ndërsa qershorin e kaluar, pas përfundimit të kontratës me klubin holandez Fortuna Sittard, ai mbetur zyrtarisht lojtar i lirë, duke kaluar të gjithë periudhën e verës pa gjetur një angazhim të ri. Në këtë fazë të karrierës së tij, kur teorikisht do të duhet të ishte në kulmin e pjekurisë sportive, ai gjendet në situatën ku shpreson në një ofertë të mundshme për t'u bashkuar me ndonjë klub si lojtar i lirë.