Botë
Skandali në Bruksel: Kënga nacionaliste serbe në zemër të BE-së vë në pikëpyetje kredibilitetin evropian
Reklamë e Sponsorizuar
Performanca e këngës shoviniste serbe “Oj Kosovo, Kosovo” gjatë hapjes së Forumit të Zgjerimit të Bashkimit Evropian në Bruksel ka shkaktuar reagime të ashpra, duke tejkaluar përmasat e një incidenti kulturor. Ky rast nuk është thjesht një pakujdesi, por një çështje e thellë politike dhe e sigurisë që godet drejtpërdrejt besueshmërinë e BE-së në raport me Kosovën dhe Serbinë.
Kjo këngë, e cila daton nga viti 1989 dhe është bërë simbol i mobilizimit nacionalist që shërbeu si bazë për politikat gjenocidale të Serbisë, mbart pretendime të hapura territoriale ndaj Kosovës. Është paradoksale dhe shqetësuese që një institucion si Bashkimi Evropian, i cili investon fonde të mëdha për promovimin e tolerancës dhe luftimin e gjuhës së urrejtjes, të lejojë që një narrativë e tillë të shpaloset në një aktivitet zyrtar. Kjo kontradiktë bëhet edhe më e mprehtë po të kemi parasysh që, në të njëjtën kohë, Kosova është lënë jashtë përfaqësimit qeveritar në panelet e nivelit të lartë të këtij forumi.
Ngjarja në Bruksel është një pasqyrë e qartë e politikës së ashtuquajtur “stabilitokraci”, të cilën BE-ja e ka aplikuar prej vitesh ndaj pushtetit të Vuçiqit. Duke i dhënë përparësi stabilitetit të përkohshëm ndaj përballjes së sinqertë me hegjemoninë e Beogradit, Brukseli po dërgon mesazhe të gabuara. Tolerimi i pretendimeve territoriale në zemër të institucioneve evropiane rrezikon të shndërrojë procesin e zgjerimit në një mekanizëm që akomodon kërkesat e Serbisë, në vend që të jetë një proces i bazuar në vlera dhe barazi.
Kjo qasje cenon rëndë edhe rolin e BE-së si ndërmjetëse e Marrëveshjes së vitit 2023, e cila obligon palët për respektimin e integritetit territorial dhe fqinjësisë së mirë. Është e papranueshme që në tryezat e dialogut të kërkohet normalizim, ndërsa në aktivitetet e Komisionit Evropian të promovohet ideologjia që i kundërvihet këtyre parimeve.
Në këtë drejtim, Komisionarja Marta Kos është e thirrur të distancohet publikisht, të kërkojë falje për këtë shfaqje dhe të ofrojë shpjegime të detajuara mbi përgjegjësinë për përzgjedhjen e këtij repertori. Bashkimi Evropian duhet të vendosë nëse zgjerimi do të mbetet një proces i bazuar në sundimin e ligjit ose nëse do të vazhdojë t'i nënshtrohet logjikës së stabilitokracisë.
Përfundimisht, pajtimi që mbyll sytë para pretendimeve territoriale nuk sjell paqe, por vetëm krijon terren për tensione dhe kriza të reja në rajon.
Reklamë e Sponsorizuar
Ky artikull është përgatitur dhe verifikuar nga redaksia e Lajmet e Reja. Të gjitha të drejtat janë të rezervuara.
Reklamë e Sponsorizuar
Shpërndaj këtë lajm: